Fransiyalik grossmeyster Alireza Firouzja sog‘lig‘idagi jiddiy muammolarga qaramay, Ruminiyada o‘tayotgan Grand Chess Tour turnirida ishtirokini davom ettirishga qaror qildi. Shaxmatchining bu qarori muxlislar va mutaxassislar orasida katta hurmat bilan qabul qilinmoqda.
Firouzjaning aytishicha, hozir unga dam olish zarur, ammo u musobaqani tark etishni istamayotganini bildirgan. U shaxmatning o‘ziga xos jihati — uni hatto karavotda yotib ham o‘ynash mumkinligini ta’kidladi.
“Menga baribir dam olish kerak. Xayriyatki, shaxmatni hatto karavotda yotib ham o‘ynash mumkin. Men o‘ynashda davom etmoqchiman, chunki oldinda hali beshta yaxshi partiya bor. Bular qiziqarli o‘yinlar bo‘ladi, men ulardan nimadir o‘rganishim aniq”, — dedi Firouzja.
Grossmeyster shifokorlar bilan maslahatlashganini ham aytib o‘tdi. Uning so‘zlariga ko‘ra, agar o‘yin vaqtida maxsus sharoit yaratilsa, ya’ni u oyog‘ini ko‘targan holda karavotda yotib o‘ynasa, musobaqada ishtirok etishi mumkinligi aytilgan.
“Shifokorga borganimizda, u agar sharoitlar mos kelsa, ya’ni men o‘yin davomida doimo oyog‘imni ko‘tarib, karavotda yotsam, o‘ynashim mumkinligini aytdi. Keyingi savol tashkilotchilar buni tashkil qila olishi va raqib o‘yinchilar bunga rozi bo‘lishi bilan bog‘liq edi. Hammasi ijobiy hal bo‘ldi. Shunday vaziyatda o‘yinlarni boy berish juda achinarli bo‘lardi”, — deya qo‘shimcha qildi u.
Bu holat Firouzjaning nafaqat iste’dodi, balki irodasi va shaxmatga bo‘lgan munosabatini ham ko‘rsatadi. Odatda bunday sharoitda sportchi musobaqani tark etishi mumkin, ammo u har bir partiyadan saboq olish va kurashni davom ettirishni afzal ko‘rmoqda.
Firouzja Javohir Sindarovga qarshi partiyasi haqida ham fikr bildirdi. U o‘yindan to‘liq qoniqmaganini, ammo endshpildagi harakatlaridan mamnun bo‘lganini aytdi.
“Sindarov bilan o‘yin unchalik qoniqarli bo‘lmadi, lekin oxirida, pozitsiyam ancha yomon bo‘lishiga qaramay, endshpilda yaxshiroq o‘ynashga muvaffaq bo‘ldim. Avvaliga yaxshi o‘ynamagan bo‘lsam-da, endshpil qanday o‘tganidan mamnunman”, — dedi shaxmatchi.
Qisqasi, Alireza Firouzja og‘ir holatga qaramay, Grand Chess Tour turnirini davom ettirishga bel bog‘ladi. Bu yerda gap faqat shaxmat haqida emas, xarakter haqida ham ketyapti. Karavotda yotib bo‘lsa ham partiyani davom ettirish — bu haqiqiy sportchi ruhi.
“Zamin”ni Telegramʻda oʻqing!
