Braziliya terma jamoasi bosh murabbiyi Carlo Ancelotti 2026-yilgi Jahon chempionati uchun tarkibni shakllantirish jarayonida Neymar bilan muhim suhbat o‘tkazdi. Italiyalik mutaxassis yulduz hujumchiga terma jamoadagi yangi maqomi va talablar haqida ochiqchasiga ma’lum qildi. Bu haqda Goal.com xabar beradi.
Globo xabariga ko‘ra, Ancelotti va texnik direktor Rodrigo Caetano 34 yoshli futbolchi bilan videoaloqa orqali bog‘lanishgan. Murabbiy Neymarga endilikda u jamoaning "daxlsiz" futbolchisi emasligini va asosiy tarkibda kafolatlangan o‘ringa ega emasligini tushuntirgan. Shuningdek, Neymar sardorlik bog‘ichidan ham mahrum bo‘lgan.
Suhbat davomida Ancelotti intizom masalasiga ham to‘xtalib o‘tdi. U Neymarga ijtimoiy tarmoqlardagi faolligini kamaytirishni va bor e’tiborini turnirga qaratishni qat’iy tavsiya qildi. Murabbiyning fikricha, futbolchining tajribasi yosh o‘yinchilar uchun muhim, biroq maydondagi roli asosan zaxiradan o‘yinga qo‘shilish bilan cheklanishi mumkin.
Shunga qaramay, Ancelotti matbuot anjumanida Neymar jismoniy holatini yaxshilaganini va turnirda muhim rol o‘ynashini ta’kidladi. Uning so‘zlariga ko‘ra, Neymar jamoa ichidagi muhitni yaxshilash va yoshlarga ustozlik qilish borasida katta yordam bera oladi.
“Zamin”ni Telegramʻda oʻqing!
