Arsenal bosh murabbiyi Mikel Arteta jamoasi Angliya Premer-ligasi chempionligini qoʻlga kiritgan lahzada qayerda boʻlgani va bu xabarni qanday qabul qilgani haqidagi qiziqarli voqeani soʻzlab berdi. Londonliklar 22 yillik tanaffusdan soʻng nihoyat oltin medallarga ega chiqishdi, biroq jamoa ustozi hal qiluvchi oʻyinni tomosha qilmaslikka qaror qilgan. Bu haqda Goal.com xabar beradi.
Manchester Siti jamoasining Bornmut bilan durang oʻynashi Arsenal chempionligini rasmiylashtirgan tunda, Mikel Arteta klub qarorgohi London Kolnida futbolchilar bilan qolish oʻrniga uyiga ketishni afzal koʻrgan. Murabbiyning soʻzlariga koʻra, u oʻyin boshlanishiga 20 daqiqa qolganda hayajonni jilovlay olmay, oilasi davrasiga yoʻl olgan.
“Bu men hayotimda his qilgan eng ajoyib tuygʻulardan biri boʻldi. Aslida yigitlar va xodimlar bilan birga oʻyinni tomosha qilishim kerak edi, lekin bunga kuch topa olmadim. Bu futbolchilarning oʻzaro nishonlaydigan lahzasi boʻlishini istadim. Uyga bordim, bogʻda barbekyu tayyorlashga kirishdim va televizorni yoqmadim”, — deydi Mikel Arteta.
Gʻalaba xabarini murabbiyga uning oʻgʻli yetkazgan. “Men tashqarida edim, mehmonxonadan shovqinlar eshitilib turardi. Toʻsatdan moʻjiza yuz berdi: toʻngʻich oʻgʻlim bogʻ eshigini ochib, yugurib keldi va meni quchoqlab: ‘Dada, biz chempionmiz!’ deb baqirdi. Bu juda goʻzal lahza edi”, — deya eslaydi murabbiy.
Arsenal oxirgi marta 2004-yilda Arsen Venger qoʻl ostida “yengilmaslar” mavsumida chempion boʻlgan edi. Ketma-ket uch mavsum ikkinchi oʻrinni egallagan Mikel Arteta jamoasi nihoyat Angliya futboli choʻqqisiga qaytdi. Murabbiyning taʼkidlashicha, bu gʻalaba jamoaning bir necha yillik mashaqqatli mehnatining mahsulidir.
“Zamin”ni Telegramʻda oʻqing!
