Atletiko Madrid rahbariyati jamoa hujumchisi Julian Alvarezning yozgi transfer oynasida Barselona safiga oʻtishi haqidagi xabarlarni keskin rad etdi. Metropolitano mutasaddilari davom etayotgan mish-mishlardan charchaganliklarini bildirib, futbolchi sotilmasligini rasman maʼlum qilishdi. Bu haqda Goal.com xabar beradi.
Klub rasmiylari Kataloniya klubi bilan hech qanday rasmiy yoki norasmiy aloqalar, uchrashuvlar yoki takliflar boʻlmaganini tasdiqladi. Manchester Siti jamoasidan kelganidan beri Madrid klubining asosiy figuralaridan biriga aylangan 26 yoshli hujumchi jamoaning uzoq muddatli rejalarida muhim oʻrin tutadi.
MARCA nashri xabariga koʻra, Atletiko Madrid rahbarlari transfer oynasi boshida OAVda tarqalayotgan asossiz xabarlardan gʻazabda. Klub bayonotida shunday deyiladi: “Oʻyinchimiz uchun hech qanday taklif boʻlmadi, uchrashuv ham oʻtkazilmadi. Biz oylardan beri davom etayotgan yolgʻonlar, yarim haqiqatlar va futbolchilarimizga nisbatan uyushtirilgan kampaniyalardan charchadik”.
Klub mutasaddilari ushbu mish-mishlarda argentinalik futbolchining aybi yoʻqligini, u doimo oʻzini professional darajada tutayotganini taʼkidladi. Julian Alvarezning Atletiko Madrid bilan 2030-yil iyuniga qadar shartnomasi mavjud boʻlib, u yakunlangan mavsumda La Liga va Chempionlar ligasi doirasida 18 ta gol urishga muvaffaq boʻldi.
Barselona Robert Lewandowski oʻrniga munosib nomzod qidirayotgan boʻlsa-da, Atletiko Madrid oʻzining 95 million yevrolik yulduzini saqlab qolishiga ishonchi komil. Poytaxt klubi oʻzining yetakchi futbolchilarini roziliksiz qoʻyib yubormaslik borasida qatʼiy pozitsiyada turibdi.
“Zamin”ni Telegramʻda oʻqing!
