Barselona yozgi transfer oynasida Manchester Siti himoyachisi Josko Gvardiolni oʻz safiga qoʻshib olishni rejalashtirmoqda. Kataloniya klubi Atletiko Madrid hujumchisi Julian Alvarez bilan muzokaralar olib borish bilan bir qatorda, himoya chizigʻini ham kuchaytirishni maqsad qilgan. Biroq, "koʻk-anorranglilar" bu borada Germaniya giganti Bavariya bilan jiddiy raqobatga kirishishiga toʻgʻri keladi. Bu haqda Goal.com xabar beradi.
Xabarlarga koʻra, Bavariya allaqachon xorvatiyalik universal himoyachini Germaniyaga qaytarish boʻyicha dastlabki soʻrovlarni amalga oshirgan. Myunxenliklar ustozi Vincent Kompany jamoaning himoyadagi muammolarini hal qilish uchun Gvardiolni asosiy nomzod sifatida koʻrmoqda. Ayniqsa, Alphonso Davies va Hiroki Ito jarohatlar bilan kurashayotgan bir paytda, Gvardiolning transferi nemis klubi uchun ustuvor vazifaga aylangan.
Germaniya futboli afsonasi Lothar Matthaus ham Bavariya ushbu transfer ustida ishlayotganini tasdiqladi. Sky nashriga bergan intervyusida u: "Men bir oʻyinchi haqida eshitdim va u boʻyicha soʻrovlar amalga oshirilmoqda. U ilgari Leypsigda oʻynagan, hozirda Manchester Siti sharafini himoya qilayotgan chap qanot va markaziy himoyachi — bu Gvardiol", deya taʼkidladi.
Shunga qaramay, Manchester Siti oʻzining 90 million yevrolik xaridini osonlikcha qoʻyib yubormoqchi emas. Pep Guardiola qoʻl ostida ishonchli oʻyin koʻrsatayotgan 24 yoshli himoyachining amaldagi shartnomasi 2028-yilgacha moʻljallangan boʻlsa-da, klub rahbariyati uni uzoq muddatga jamoada olib qolish uchun yangi bitim tayyorlamoqda.
Barselona uchun bu transferni amalga oshirish moliyaviy jihatdan ancha murakkab kechishi kutilmoqda. Klub bir vaqtning oʻzida ham Gvardiol, ham Alvarezni sotib olishni istasa, oʻzining iqtisodiy holatini jiddiy ravishda tartibga solishi talab etiladi. Hozircha har ikki grand klub ham futbolchining vakillari bilan aloqada boʻlib turibdi.
“Zamin”ni Telegramʻda oʻqing!
