Real Madrid prezidenti Florentino Perez Alvaro Arbeloa oʻrniga yangi murabbiy izlash jarayoni haqida maʼlumot berdi. Klub rahbari ayni damda ikki nafar asosiy nomzodni koʻrib chiqayotganini tasdiqladi. Television Espanola nashriga bergan intervyusida Perez klub yangi bosqichga tayyorlanayotganini va qaror qabul qilinishiga oz qolganini bildirdi. Bu haqda Goal.com xabar beradi.
Suhbat davomida Jose Mourinho’ning Santyago Bernabeuga qaytishi mumkinligi haqidagi savolga ham javob berildi. Perez portugaliyalik mutaxassisni yuqori baholashini taʼkidlagan boʻlsa-da, hozircha u bilan rasmiy muzokaralar oʻtkazilmaganini ochiqladi. "Men bu haqda oʻylayapman. Nomzodlar bormi? Ha, ikkita. Mourinho — shubhasiz yaxshi murabbiy, lekin men hozircha hech narsani eʼlon qilmayman, chunki u bilan hali gaplashganim yoʻq", — dedi prezident.
Shuningdek, Florentino Perez prezidentlik saylovidagi raqibi Enrique Riquelme’ni keskin tanqid ostiga oldi. U oʻzini klubni beqarorlikdan himoya qiluvchi shaxs sifatida koʻrsatib, raqiblarini Ramon Calderon davridagi salbiy muhitga qiyosladi. Perezning soʻzlariga koʻra, klubni ichkaridan parchalashga boʻlgan urinishlar sezilgani sababli u saylovlarni eʼlon qilgan.
Prezident Riquelme’ning moliyaviy holatiga ham shubha bilan qaradi. U raqibining yillik 54 foiz stavka bilan kredit olganini aytib, bunday inson klubni oʻz shaxsiy manfaatlari uchun ishlatishi mumkinligidan ogohlantirdi. Real Madrid prezidentligi uchun saylovlar 7-iyun kuni boʻlib oʻtishi rejalashtirilgan.
Hozircha Los Blancos Arbeloa oʻrniga munosib oʻrinbosar qidirishda davom etmoqda. Saylov natijalari jamoaning kelgusi mavsumdagi bosh murabbiyi kim boʻlishini aniqlab berishi kutilmoqda. Muxlislar va ekspertlar diqqat markazida esa hamon Jose Mourinho va boshqa maxfiy qolayotgan nomzodlar turibdi.
“Zamin”ni Telegramʻda oʻqing!
