«Neftchi» o‘yinlariga guvoh bo‘larkanman, o‘tmishi buyuk, buguni ayanchli ahvolda bo‘lgan Farg‘ona jamoasiga achindim. O‘zbekistonning 5 karra chempioni, 9 karra vitse-chempionining hozirda Oliy Liganing 15-o‘rinidan joy olib turganligi nafaqat farg‘onalik muxlislar, balki o‘zbek futboli ixlosmandlarining dilini xira qilishi tabiiy. Xo‘sh, muammo aslida qayerda va natijalar yaxshilanishi uchun yana qancha vaqt kerak?
FYoDOROV
Andrey Fyodorov o‘tgan yillar davomida Farg‘onada yaxshi faoliyat yuritgan bo‘lsada, bu yil «Neftchi» muammolariga «poydevor» qo‘yib ketgan shaxsga aylandi. Bosh murabbiy yil boshida «Neftchi» bilan Turkiyada yig‘in o‘tkazib, tarkibni legionerlar bilan boyitgan bo‘lsada, dastlabki uch oy tayyorgarlik va tarkib borasida Fedorov jiddiy xatolarga yo‘l qo‘yganligini ko‘rsatdi. «Neftchi» uzoq vaqt g‘alaba nimaligini bilmay, autsayderlar safini tark etmadi. Natija yo‘qmi, bosh murabbiy almashtirilishi futbolimiz uchun odatiy hol. Eng qizig‘i, Andrey Fyodorov «Neftchi»dagi so‘nggi o‘yinida Toshkentda «Lokomotiv»ga 4:0 hisobida mag‘lub bo‘lib, Farg‘onani tark etgach, uning yangi ish joyi peshqadam «Lokomotiv» klubi bo‘ldi.
ABRAMOV
Birinchi davraning 12-turidan keyin «Neftchi»ni Vadim Abramov qo‘lga olgach, vodiylik muxlislar terma jamoa sobiq ustozining Farg‘ona futboli mavqeini tiklashidan umidvor bo‘lib, quvonishgandi. Debyut bahsda Abramov jamoasi Farg‘onada «Dinamo»ga mag‘lub bo‘lgach, murabbiyning sehrgar emasligi yangragandi. Shundan keyin ham «Mash’al», «Metallurg», «Sho‘rtan»ga qarshi bahslarda ham muvaffaqiyatsizlik davom etishi omadsizlik bilan bog‘lanaverdi. «Paxtakor»ga 6:0 hisobidagi mag‘lubiyat esa jamoa yuziga tortilgan tarsaki misoli ta’sir qildi. «Navbahor» bilan durangdan keyin, «Qo‘qon-1912»ga mag‘lub bo‘lishi esa inqiroz davom etishini anglatardi.
«Futbolchilar shunchaki futbol o‘ynashdan qo‘rqishadi. Faqat darvozabon ko‘proq to‘p uzatishlarni amalga oshirdi. U maydonda markaziy himoyachidek harakat qildi. Maydonda undan boshqa himoyachi ko‘rmadim. Bugun jamoa juda yomon o‘ynadi. Mansur Saidovni nega almashtirdim? Chunki u birorta to‘g‘ri to‘p uzatishni amalga oshira olmadi. Tajribali, yetakchi futbolchi jamoadoshlarini o‘z ortidan ergashtirish o‘rniga ketma-ket xatolarga yo‘l qo‘ydi. Farg‘onalik muxlislardan ushbu sharmandali mag‘lubiyat uchun uzr so‘rayman. Biz antirekordlarni qayd etishda davom etyapmiz. «Neftchi» hali o‘z tarixida «Paxtakor»ga bu kabi sharmandali yutqazmagan. Bugun ustimizdan kulishlariga yo‘l qo‘yib berdik. «Paxtakor»ga biz kabi kuchsiz jamoalar qarshilik qilmaydi endi» — deya fikr bildirgandi «Paxtakor» bilan o‘yindan keyin Abramov.
Karlenovichning fikrlarini o‘qib savol tug‘iladi: o‘yinda futbolchilarni qo‘rqmaslikka, himoyachilarni barqaror o‘yin ko‘rsatishga, «Neftchi» ustidan kulmaslikka yo‘l bermaslik uning ishi emasmidi? Davralar oralig‘ida «Neftchi»ning 6 nafar futbolchisiga javob berib, yangi 8 futbolchi olib kelgan murabbiy jamoasi o‘yiniga javobgar emasmi? Albatta, hali oldinda o‘yinlar bor, ammo bu ketishda jamoa chindanam antirekordlarni yangilashda davom etamaydimi?
KAPADZE
Yuriy Sarkisyan «Neftchi»ni tark etgach, Tohir Kapadze Farg‘ona futbolidagi muhim shaxslardan biriga aylangandi. Aynan uning boshchiligida «Neftchi» dastlab kuchli beshlikdan joy olgan bo‘lsada, keyinchalik natijalar pasayaverdi. «Neftchi»ni tark etib, «Qo‘qon-1912», Farg‘ona Futbol Federatsiyalarida faoliyat yuritib kelgan tajribali mutaxassis joriy yildan yana «Neftchi» raisiga aylandi. Aynan Kapadzening taklifiga binoan Abramov «Neftchi» bosh murabbiyiga aylandi. Tajribali mutaxassislarda davralar oralig‘ida «Neftchi»da ijobiy o‘zgarish qilish uchun yetarlicha vaqt bo‘lgandi, ammo natijalar salbiy ko‘rinishdan boshqa rangga o‘zgarmayapti.
FUTBOLChILAR
«Neftchi» chempionlikka erishib yurgan paytlarda jamoaning eng katta yutug‘i mahalliy yoshlariga ishonch bildirishida, deb aytilardi. Bunda Yuriy Sarkisyanning xizmati katta bo‘lganligini hech kim inkor etolmaydi. Vazgenovichdan keyin esa jamoa o‘z tarbiyalanuvchilardan ko‘ra, nomlarga ishona boshladi. Birgina ushbu mavsumni oladigan bo‘lsak, yil boshida klubning Turkiyadagi yig‘inidan keyin Fyodorov 8 nafar yangi futbolchi taklif etgan bo‘lsa, ikkinchi davrada Abramov ularning 6 nafari bilan amaldagi shartnoma bekor qildirdi. Bu Fedorov seleksiyada jiddiy xato qilganligi bilan bog‘liqmi yoki Abramovga bu futbolchilar yoqmaganmi, aytish qiyin. Shunisi aniqki, klub legionerlar va qolgan futbolchilar uchun katta xarajat qilgan bo‘lsada, harakatlarning barchasi nolga teng bo‘ldi.
SARKISYaN QADRI
26 yillik faoliyati davomida «Neftchi» ramziga aylangan Yuriy Sarkisyanning Farg‘ona futbolidan xunuk tarzda ketishi va o‘shandan buyon vodiyning bosh jamoasi tobora o‘z mavqeini yo‘qotayotganligi bugungi kunda Sarkisyanning qadrini yaqqol bilintirmoqda. Faxriy murabbiyning endi yana «Neftchi»ga ishlashga rozi bo‘lishi dargumon bo‘lsada, Farg‘ona klubi rahbariyati Yuriy Vazgenovichni Farg‘onaga chaqirib, u bilan do‘stona aloqalarni tiklab, chiroyli xayrlashishiga nima to‘sqinlik qilmoqda? Balki shundan keyin «Neftchi» o‘ziga kelar…
Farhod Aslamov, «Erudit Sport» gazetasi.
Manba: www.erudit-sport.uz “Zamin” yangiliklarini “Odnoklassniki”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
AQSH harbiylari orasida o‘z joniga qasd qilish ko‘paydi
Har qanday katta yoshdagi kishi yetuk emas
Pashinyan Armanistonning Mustaqillik deklaratsiyani eng katta muammo va fojia deb atadi
Blinken Isroildan uchta muammoni hal etishni talab qildi
Yaxshi pishgan va mazali anor tanlashga yordam beradigan tavsiyalar
Erdo‘g‘on Turkiya Isroil bilan aloqalarini uzganini ma’lum qildi
Donald Tramp 27 yoshli Karolin Levittni Oq uy matbuot kotibi etib tayinlamoqchi
Jo Bayden: “Ba’zan xotinim meni kosmosga jo‘natish bilan tahdid qiladi”
