23:58 / 12.05.2021
1 530

Baxtiyor Ashurmatov: "VAR'dan foydalanish o‘zbekistonlik hakamlarga emas shekilli"

Baxtiyor Ashurmatov: "VAR'dan foydalanish o‘zbekistonlik hakamlarga emas shekilli"

Superliganing 8-turidan o‘rin olgan "Paxtakor" - "Qo‘qon-1912" (3:0) uchrashuvidan keyin mehmonlar bosh murabbiyi Baxtiyor Ashurmatov o‘z fikrlarini bildirdi.

"Avvalambor xalqimizni, muxlislarimizni kirib kelayotgan Hayit bayrami bilan tabriklayman. Doimo sog‘ bo‘lishsin. Bahsni yomon boshlamadik, "Paxtakor"ga qarshi o‘yinda chuqur himoyada o‘ynash baribir ertami-kechmi pand berishi mumkin edi. Shu bois ikki nafar hujumchi bilan o‘yinni boshladik. Golgacha bizda ikkita-uchta imkoniyat bo‘ldi. "Paxtakor" esa ilk xavfli hujumni gol bilan tugatishdi va shundan keyin raqiblarda o‘ziga bo‘lgan ishonch ortdi. Bugungi g‘alabaga sabab - "Paxtakor" safida mahoratli futbolchilarning ko‘pligi.

To‘p nazoratini "Paxtakor"ga berib qo‘ysangiz baribir gol o‘tkazardik. Mag‘lubiyatdan keyin murabbiy noto‘g‘ri taktika tanlagan bo‘lib chiqadi. Ammo hisob ochilgunga qadar biz ko‘proq vaziyatlar yaratdik. O‘sha gol o‘yinda tub burilish yasadi. Balki bir hujumchi bilan tushib, asosiy urg‘uni himoyaga berishimiz ham mumkin edi. Ammo aytganimdek "Paxtakor" bunday o‘yinlarda baribir ijobiy natijaga erishardi.

Muzaffar Abdullayev bu mavsum ishonchli o‘ynab kelayotgandi, afsuski "Andijon" bilan bahsda olgan jarohati bugun maydonga tushishiga imkon bermadi. Umid qilamanki keyingi o‘yingacha Abdullayev safimizga qaytadi. Tarkibimizda 3 nafar darvozabon bor, navbatdagi bahsda qaysi darvozabon tushishini o‘yinga yaqin aniqlaymiz.

Hujumni kuchaytirishimiz kerak. Norbekov va Meliyev ko‘plab imkoniyatlarga ega bo‘lishmoqda. Vaziyatlardan foydalana olmaslik asosiy muammolarimizdan biri bo‘lib turibdi. Balki yozda hozirgi hujumchilarimiz yoniga "gol hidini sezadigan" hujumchi olib kelarmiz. Bir vaqtlar "Paxtakor"da Igor Shkvirin shunday edi.

"Paxtakor" balki o‘tgan yilgidek tarkibi kuchli emasdir, ammo yosh futbolchilar yaxshi harakat qilishmoqda.

Asosiy tarkibni tanlashda men va murabbiylar shtabi ayrim xatolarga yo‘l qo‘ydik. Chunki "Paxtakor"dek jamoaga qarshi o‘ynaganda bir futbolchi o‘yin tempidan tushib qolsa bu juda ham katta yo‘qotish bo‘ladi. Birinchi taymda ba’zi futbolchilar jismoniy tomonlama tayyor emasligi ko‘rindi.

Birinchi pas uzatishda ko‘p xatoga yo‘l qo‘ymoqdamiz. To‘pni nazorat qilishda boshqalarga nisbatan bo‘shroq. Oldin ham aytgandim Quvondiq Ro‘ziyevdek futbolchi yo‘q, uning ketishi katta yo‘qotish bo‘ldi. Tarkibimizda Bambadan tashqari bironta ijrochi yo‘q. Merzlyakov va Xolmuhammedov kabi futbolchilar jonini berib o‘ynmoqda. Nega kimdir bor kuchi bilan o‘ynaydiyu, kimdir 60 foiz kuch bilan o‘ynaydi?

VAR'dan foydalanish o‘zbekistonlik hakamlarga emas shekilli. To‘p autga chiqib ketsa ham to‘xtatib eshitmoqda yoki har bir vaziyatga...birinchi taymda 5-6 marta to‘xtalish bo‘ldi. Bu o‘yin tempi tushib ketishiga sabab bo‘lmoqda. Qizil kartochka, penalti va o‘yindan tashqari holatni aniqlashda VAR ishlatiladi. Yana bir narsa o‘yinda hisob 3:0 va hakamlar uchrashuvga 6 daqiqa qo‘shishmoqda. Germaniya yoki Ispaniyada e’tibor qilsanglar hisob yirik bo‘lsa kamroq vaqt qo‘shiladi. Taxmin qilaman agar so‘nggi daqiqalarda hisob 1:0 bo‘lib turganida 3 daqiqa qo‘shilardi va bahs tezroq tugatilardi. Tushunarsiz holat lekin nima bo‘lganda ham ayb o‘zimizda deb o‘ylayman", - deydi Baxtiyor Ashurmatov.

Ctrl
Enter
Xato topdIngizmi?
Iborani ajratib Ctrl+Enter tugmasini bosing
Fikrlar (0)


Yangiliklar » Sport » Baxtiyor Ashurmatov: "VAR'dan foydalanish o‘zbekistonlik hakamlarga emas shekilli"