Futbol transferlariga ixtisoslashgan transfermarkt portali Italiya chempionati A Seriyasi ishtirokchisi “Jenoa” tarixidagi eng qimmat transferlar o‘nligini tuzib chiqdi.
Ma’lumki, Genuya klubi o‘zbekistonlik muxlislar uchun begona emas. O‘zbekiston milliy terma jamoasi hujumchisi va ayni paytdagi sardori Eldor Shomurodov debyut mavsumini aynan “Jenoa”da o‘tkazgan va ushbu jamoadagi gollari hisobiga kuchli beshlik chempionatlarida gol urgan birinchi va yagona o‘zbek futbolchisiga aylangan.
Transfermarkt portali “Jenoa”ning eng qimmat transferi sifatida Kshishtof Pyontekning “Mtlan”gani o‘tganini qayd etgan. 2018-2019 yilgi mavsumda milanliklar polshalik hujumchi uchun genuyaliklarga 35 million yevro to‘lagan.
Polsha terma jamoasi hujumchisi genuya klubida bir mavsumda 19 ta uchrashuv o‘tkazib, 13 ta gol urdi. Milanliklar tarkibida Pyontek ikki mavsum o‘ynadi, lekin sermahsul hujumchiga aylana olmadi. U “Milan”da 36 ta o‘yinda 13 marta raqib darvozasini ishg‘ol qilgandi.
Eng qimmat transferlar reytingining kuchli uchligidan ikki argentinalik futbolchi - Diyego Milito va Kristian Romero o‘rin oldi. Hujumchi Milito “Jenoa”da ikki marta o‘ynagan. 2004-2005 yilgi mavsumda genuyaliklar safida 59 ta uchrashuvda 33 ta gol urgan to‘purarni “Real Saragosa” o‘z safiga qo‘shib oldi. Ispaniyada 109 ta bahsda 51 ta to‘p kiritgan Milito uch yildan so‘ng Genuyaga qaytarildi.
Ikkinchi kelishida 31 ta o‘yinda 24 ta to‘p kiritgan Militoni bu gal “Inter” 28 million yevro evaziga olib ketdi. Mana shu transfer “Jenoa”ning eng qimmat sotuvlari ro‘yxatida ikkinchi o‘rinda turadi. Milito milanliklar safida ham to‘purarlik mahoratini namoyish qilib, 128 ta uchrashuvda o‘z hisobiga 62 ta gol yozdirib qo‘ydi.
Kristian Romero Genuya klubida 2019-2020 yillar davomida to‘p surgan. Ikki yil ichida ma’lum muddat “Yuventus”ga ham borib keldi. Biroq turinliklar argentinalik himoyachini birorta uchrashuvda o‘ynatmay, “Jenoa”ga qaytarib yubordi. Ikki mavsum davomida genuyaliklar safida jami 58 marta maydonga tushib, uchta gol urgan himoyachini “Atalanta” 26 million yevroga sotib oldi. Romero bu mavsumdan e’tiboran “Tottenxem” futbolchisi hisolanadi.
Eldor Shomurodov transferi esa reytingni o‘ninchi pog‘onasidan o‘rin olgan. Umumiy reyting bilan quyida tanishib oling va shundan so‘ng mulohazani davom ettiramiz.
Shomurodov transfer summasi muntazam o‘sib borayotgan futbolchilar qatoridan muqim o‘rin olib kelmoqda. Eldor 2017 yilning 15 iyulida “Bunyodkor”dan “Rostov”ga transfer qilinganida uning transfermarkt portalidagi narxi 750 ming yevro edi. Biroq, rostovliklar Toshkent klubiga 300 ming yevro to‘lab, iste’dodli futbolchini legionerga aylantirgan.
“Rostov” o‘zbek hujumchisini uch yil o‘ynatib, narxini bir necha baravar oshirdi. 2020 yilning oktabrida “Jenoa” Shomurodovni Italiya chempionatiga olib o‘tdi. Transfer summasi, bonuslar va keyingi sotuvdan ulushni qo‘shib hisoblaganda Genuya klubi “Rostov”ga umumiy hisobda 9 million yevro to‘lagani qayd etilgan. Shu pallada Eldorning transfermarkt portalidagi narxi 6,5 million yevroga tenglashtirilgan edi.
Nihoyat, “Jenoa” safida Italiya chempionatida 31 ta uchrashuvda 8 ta gol urgan legionerimizni joriy yilning yozida “Roma” transfer qildi. Genuyaliklar Eldorning transferidan mo‘may daromad ko‘rdi. Rimliklar Joze Mourinoning istagini qondirib, Shomurodovni poytaxtga ko‘chirib kelish uchun 17,5 million yevrodan voz kechdi.
Garchi “Roma” Eldorni katta summaga xarid qilgan bo‘lsa-da, hujumchimizning transfermarkt portalidagi narxi 7 millionligicha qoldi. Shu yilning 14 oktabriga kelib, Shomurodov transfer summasi mazkur portal reyestrida ikki baravar ko‘tarildi va hozirgi paytda 14 million yevroga yetdi. Shu tariqa, Shomurodov o‘zbek futboli tarxida eng qimmat o‘yinchiga aylandi.
“Jenoa”ning eng qimmat transferlariga e’tibor qaratsak, genuyaliklar o‘zlari topgan futbolchilarga A Seriyada o‘zini ko‘rsatish imkoniyatini yaratib berish orqali ularni katta klublarga transfer qilganini ko‘ramiz. “Jenoa” bundan yaxshi foyda topmoqda... “Zamin” yangiliklarini “Facebook”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
Rashida Tolib Kongress a’zolariga «achchiq haqiqat»ning suratini ko‘rsatdi
20 yoshli o‘zbekistonlik qizni qarindoshi Turkiyaga sotib yubordi
KXDR yetakchisi dronlarni ommaviy ishlab chiqarishni yo‘lga qo‘yishni buyurdi
Bayden va Jinping Peruda uchrashdi: «Agar bir-birimizni raqib deb bilsak, munosabatlarni buzamiz»
Shols va Putin o‘rtasidagi suhbat Kiyevga signal bo‘ldi
Turkiyaning Harper's Bazaar nashri yil ayolini aniqladi (foto)
Buyrak salomatligi uchun eng foydali sabzavot...
Ayrim boshqaruv servis kompaniyalari shartnomalarida asossiz shartlar belgilangani aniqlandi
