«Gazni bos, Nodirbek!» — Saida Mirziyoyeva Magnus Karlsenni yutgan o‘zbekistonlik yosh shaxmatchi bilan faxrlanishini aytdi

^{Foto: Telegram / Saida Mirziyoyeva}
Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari Saida Mirziyoyeva 17 yoshli Nodirbek Abdusattorov shaxmat bo‘yicha 5 karra jahon chempioni Magnus Karlsenni mag‘lubiyatga uchratgani munosabati bilan uni tabriklab, post yozdi.

«17 yoshli hamyurtimiz Nodirbek Abdusattorov 5 karra jahon chempioni Magnus Karlsen ustidan g‘alaba qozondi! Karlsen ikkinchi bor o‘zbekistonlik yoshlarimizga mag‘lub bo‘lmoqda!

Barakalla, Nodirbek! Sen O‘zbekiston nomini dunyoga tanityapsan. Esimda bor, Nodirbek ‘Zakovat gambit’ turnirida ham g‘olibi bo‘lgandi. Bugungi g‘alabadan faxrlandim!

Gazni bos, Nodirbek! BIZ SЕN BILAN! FAQAT OLG‘A! BIZ SЕN BILAN FAXRLANAMIZ», – deb yozadi Mirziyoyeva.

Ma’lumot uchun, Polsha poytaxti Varshava shahrida shaxmatning blis va rapid yo‘nalishlari bo‘yicha jahon chempionati bo‘lib o‘tmoqda. Unda ishtirok etayotgan o‘zbekistonlik Nodirbek Abdusattorov (2593) 5 karra jahon chempioni Magnus Karlsenga (2842) qarshi dona surdi va sensatsion g‘alabaga erishdi.

10-tur doirasidan o‘rin olgan ushbu bahs turnir jadvalidagi yaqqol peshqadamlikni aniqlab berishi bilan ahamiyatli edi. Boisi bungacha Karlsen 7,5 ochko bilan birinchi, 17 yoshli Abdusattorov esa 7 ochko bilan ikkinchi pog‘onani egallab turgan edi. Shu tariqa Abdusattorov ushbu g‘alabadan keyin bosh sovrin sari dadil qadam tashladi.

Rapid yo‘nalishida yana 3 turdan so‘ng g‘olib aniqlanadi. Agar Nodirbek qolgan bellashuvlarda ham peshqadamlikni saqlab qola olsa, ushbu yo‘nalish bo‘yicha jahon chempioniga aylanadi.

Eslatib o‘tamiz, 2018 yil dekabr oyida 16 yoshli Shamsiddin Vohidov ham jahonning birinchi raqamli shaxmatchisini mag‘lub qilgandi. “Zamin” yangiliklarini “Instagram”da kuzatib boring