Lazizbek Mullojonov: Maqsadim Olimpiada va jahon chempionligi

Xabaringiz bor, Bolgariyaning Sofiya shahrida boʻlib oʻtgan Stranja turnirida vakillarimiz muvaffaqiyatli ishtirok etib, umumjamoa hisobida birinchi oʻrinni qoʻlga kiritishdi. Ushbu musobaqada +92 kg vaznda ishtirok etgan hamyurtimiz Lazizbek Mullojonov ham barcha raqiblarini magʻlub etgan holda oltin medalga ega chiqqan edi. Musobaqadan soʻng, bokschimiz bilan bogʻlanib bir nechta savollarga javob oldik.

- Stranja turniri borasida taassurotlar qanday?
- Stranja turniridan taassurotlarimiz katta. Bu musobaqa kichik jahon chempionati deya e'tirof etiladi. Oʻzim uchun bu ulkan tajriba boʻldi.

- Jaxon chempionatiga nisbatan bu safar jismoniy holatingiz a'lo darajada ekanligi koʻzga tashlandi. Bu borada maxsus ishladingizmi?
- Men bu turnirda Serbiyadagi jahon chempionatiga nisbatan oʻzimni yaxshi his qildim. Lekin baribir harbiylar oʻrtasidagi jahon chempionatichalik emas. Magʻlubiyatdan soʻng oʻzimni yaxshi tiklab bormoqdaman. Jahon chempionatiga ketishdan oldin oxirgi mashgʻulotlarda betob boʻlib qolgan edim. Davolanish uchun vaqt ham boʻlmagan edi va bu jangimda bilindi hamda shuni hisobiga Serbiyadagi jahon chempionatida magʻlub boʻldim deb oʻylayman.

- Nima deb oʻylaysiz,xavaskor boksda yurishingiz siz uchun qanchalik muhim. Demoqchimanki, Parij 2024 Olimpiadasiga qadar Bahodir Jalolov baribir birinchi raqamli hisoblanadi?
- Xudo xohlasa, nasib qilsa 2024 yilgi Olimpiada oʻyinlariga borish niyatim bor, lekin Jalolov birinchi raqamli hisoblanadi. Oʻylaymanki, keyingi Olimpiadagacha Osiyo chempionatlari, Osiyo oʻyinlari musobaqalarida oʻzimizni koʻrsata olsak, imkoniyat berishadi deb oʻylayman.

- Balki asosiy e'tiborni professional boksga qaratish kerakdir?
- Toʻgʻrisi professional boksga unchalik e'tiborimni qaratgim kelmayapti. Maqsadim havaskor boksda Olimpiada va jahon chempionligi.

Ma'lumot uchun, 22 yoshli Mullojonov yoshlar oʻrtasida Osiyo chempioni, harbiylar oʻrtasida jahon chempioni, 2 karra Oʻzbekiston chempioni va bir qancha yirik turnirlar gʻolib va sovrindori sanaladi. “Zamin” yangiliklarini “Telegram”da kuzatib boring