AQShda termoyadroviy energetikani rivojlantirish bo'yicha hamkorlik yo'lga qo'yildi

Amerikaning "Inertia Enterprises" kompaniyasi Livermor milliy laboratoriyasi (LLNL) bilan termoyadroviy texnologiyalarni ilmiy tajribalardan amaliy foydalanishga o'tkazishni tezlashtirish maqsadida hamkorlikni e'lon qildi. Tomonlar tijorat termoyadroviy elektr stansiyalarini yaratishga to'sqinlik qilayotgan asosiy muhandislik muammolarini birgalikda hal qilishni rejalashtirmoqda. Bu haqda Ixbt.com xabar beradi.

Loyiha doirasida yangi optik materiallar, lazer komponentlari va kuchli lazer qurilmalari uchun prototiplar ishlab chiqiladi. Alohida e'tibor inersial sintez tajribalarida energiya olish uchun asosiy rol o'ynaydigan maxsus yonilg'i kapsulalariga — termoyadroviy nishonlarga qaratiladi.

Inersial termoyadroviy sintez usuli vodorodli kichik kapsulani kuchli lazerlar yordamida siqish orqali energiya olishni ko'zda tutadi. Jarayon davomida yuzaga keladigan ekstremal harorat va bosim natijasida atom yadrolari birlashib, yulduzlardagi kabi ulkan energiya ajralib chiqadi.

Hamkorlik doirasida "Inertia" kompaniyasi laboratoriyaning inersial sintez texnologiyalari bilan bog'liq 200 ga yaqin patentidan foydalanish imkoniyatiga ega bo'ldi. Bu ilmiy natijalarni sanoat yechimlariga aylantirish va kelajakda ishlab chiqarish bazasini yaratish jarayonini sezilarli darajada tezlashtirishi kutilmoqda.