Amazon kompaniyasining bulutli xizmatlar biznesi kutilganidan ko'proq daromad keltirmoqda. Bunga sun'iy intellekt texnologiyalarining jadal rivojlanishi asosiy sabab bo'ldi. Bu haqda Techcrunch.com xabar beradi.
Kompaniya bosh direktori Endi Jassi bu yo'nalishdagi xarajatlar ham ortib borayotganini ta'kidladi.
Amazon Web Services (AWS) tarmog'ining sof savdosi o'tgan yilga nisbatan 28 foizga o'sib, 37,6 milliard dollarga yetdi. Bu so'nggi 15 chorakdagi eng tez o'sish ko'rsatkichi hisoblanadi.
Jassining so'zlariga ko'ra, AWS muvaffaqiyati sun'iy intellekt sanoatini hisoblash quvvatlari bilan ta'minlashdagi o'rni bilan bog'liq.
Kompaniya bulutli infratuzilmani qurish uchun katta miqdorda sarmoya kiritishda davom etmoqda. Jassi qisqa muddatli kapital xarajatlar o'sishi saqlanib qolishini ma'lum qildi.
Uning ta'kidlashicha, AWS qanchalik tez o'ssa, shuncha ko'p qisqa muddatli xarajatlar talab etiladi.
Amazon hisobotiga ko'ra, erkin pul oqimi 1,2 milliard dollargacha kamaygan. Bunga asosan mulk va uskunalar xarid qilish uchun sarflangan 59,3 milliard dollarlik xarajatlar sabab bo'lgan.
Ushbu xarajatlarning katta qismi sun'iy intellekt infratuzilmasiga yo'naltirilgan.
Shu bilan birga, elektron tijorat gigantining umumiy savdosi o'tgan yilga nisbatan 17 foizga oshib, 181,5 milliard dollarni tashkil etdi. Shimoliy Amerikada savdo hajmi 12 foizga, dunyoning qolgan qismida esa 19 foizga o'sgan.
“Zamin”ni Telegramʻda oʻqing!
