Pensilvaniya shtati Character.AI kompaniyasini sudga berdi

Pensilvaniya shtati Character.AI kompaniyasiga qarshi sud da'vosini kiritdi. Rasmiylarning ta'kidlashicha, kompaniya sun'iy intellekt chat-boti o'zini psixiatr sifatida ko'rsatib, shtatning tibbiy litsenziyalash qoidalarini buzgan. Bu haqda Techcrunch.com xabar beradi.

Shtat gubernatori Josh Shapiro o'z bayonotida fuqarolar internetda kim yoki nima bilan muloqot qilayotganini bilishga haqli ekanligini ta'kidladi. Ayniqsa, sog'liqni saqlash masalalarida sun'iy intellekt vositalari foydalanuvchilarni litsenziyaga ega shifokor bilan gaplashayotganiga ishontirib, chalg'itmasligi kerak.

Sud hujjatlariga ko'ra, Character.AI platformasidagi Emilie nomli chat-bot o'zini litsenziyali psixiatr deb tanishtirgan va hatto soxta tibbiy litsenziya raqamini ham o'ylab topgan. Bu holat Pensilvaniyaning Tibbiy amaliyot to'g'risidagi qonuniga zid deb topildi.

Character.AI vakillari foydalanuvchilar xavfsizligi ustuvor vazifa ekanini ta'kidlab, har bir chatda sun'iy intellekt tomonidan aytilgan ma'lumotlar badiiy to'qima ekanligi va ularga professional maslahat sifatida tayanmaslik kerakligi haqida ogohlantirishlar mavjudligini bildirdi.

Nodirbek Razzokov

«ZAMIN.UZ» muharriri

+ Zamin.uz saytini Google'ga qo'shing