Amazon UK va Amazon Germany platformalarida Sony Xperia 1 VIII flagmanining sahifalari muddatidan oldin paydo boʻldi. Sizib chiqqan maʼlumotlarga koʻra, smartfon 2026-yil 26-iyunda taqdim etilishi kutilmoqda. Yangi model oʻzining anʼanaviy uslubini saqlab qolgan holda, yangilangan korpus va kvadrat shaklidagi kamera bloki bilan ajralib turadi. Bu haqda Ixbt.com xabar beradi.
Qurilma 6,5 dyuymli FHD+ OLED-displey, 120 Gts yangilanish tezligi va 19,5:9 nisbatdagi ekran bilan jihozlanadi. Asosiy kamera tizimi uchta moduldan iborat boʻlib, ulardan biri 48 megapikselli teleobyektiv hisoblanadi. Shuningdek, smartfonda suratga olish sifatini oshirish va batareya quvvatini tejash uchun maxsus Xperia AI dasturiy taʼminoti qoʻllaniladi.
Texnik xususiyatlar qatoriga 3,5 mm audio uyasi, ikkita SIM-karta qoʻllab-quvvatlashi va ikki kunlik avtonom ishlash muddati kiradi. Baʼzi maʼlumotlarga koʻra, smartfonni xarid qilgan dastlabki mijozlar bonus sifatida Sony WH-1000XM6 quloqchinlarini qoʻlga kiritishlari mumkin.
Eng muhim yangilik esa narx bilan bogʻliq. Buyuk Britaniya bozorida Xperia 1 VIII 1728 funt sterling, Germaniyada esa 1868 yevro narxda sotuvga chiqishi kutilmoqda. Bu koʻrsatkich avvalgi Xperia 1 VII modeliga nisbatan sezilarli darajada qimmatroq ekanligini anglatadi.
“Zamin”ni Telegramʻda oʻqing!
