Mashhur tanishuv ilovasi Bumble o‘zining asosiy xususiyati bo‘lgan "swipe" (ekranni surish) funksiyasini olib tashlashga qaror qildi. Kompaniya bosh direktori Uitni Vulf Xerdning so‘zlariga ko‘ra, bu o‘zgarish tanishuvlar sohasida inqilobiy qadam bo‘ladi va foydalanuvchilar uchun yangi tajriba taqdim etadi. Bu haqda Techcrunch.com xabar beradi.
Ushbu qaror Bumble uchun moliyaviy qiyinchiliklar kuzatilayotgan bir davrga to‘g‘ri keldi. Joriy yilning birinchi choragida ilovaning pullik foydalanuvchilari soni 21 foizga kamayib, 3,2 millionni tashkil etdi. Kompaniya rahbariyati ushbu pasayishni foydalanuvchilar bazasini "sifatliroq" qilish maqsadidagi ataylab qilingan qayta yuklash deb atamoqda.
Kelgusi o‘zgarishlar sun’iy intellekt texnologiyalariga asoslanishi kutilmoqda. Bumble allaqachon "Bee" nomli sun’iy intellekt yordamchisi ustida ishlamoqda. Vulf Xerd kelajakda shaxsiy sun’iy intellekt botlari foydalanuvchilar o‘rniga boshqa botlar bilan muloqot qilishi mumkinligini ham istisno etmayapti.
Ilovaning yangilangan versiyasi joriy yilning oxirgi choragida taqdim etilishi rejalashtirilgan. Ungacha foydalanuvchilar tanishuv jarayonida odatiy "swipe" funksiyasidan foydalanishda davom etishlari mumkin.
“Zamin”ni Telegramʻda oʻqing!
