Tanishuv ilovalari bozorida faoliyat yurituvchi Bumble kompaniyasi o‘zining moliyaviy hisobotini e’lon qildi. Unga ko‘ra, 2026-yilning birinchi choragida pullik obunachilar soni 21,1 foizga qisqarib, 3,2 million nafarni tashkil etdi. Garchi foydalanuvchilar bazasi kamaygan bo‘lsa-da, kompaniya buni ataylab amalga oshirilgan strategik o‘zgarish deb atamoqda. Bu haqda Techcrunch.com xabar beradi.
Bumble rahbariyati miqdor emas, balki sifatga e’tibor qaratishga qaror qildi. Natijada, har bir foydalanuvchidan tushadigan o‘rtacha daromad 9 foizga oshdi, sof foyda esa 52,6 million dollargacha ko‘tarildi. Kompaniya asoschisi Whitney Wolfe Herd bu jarayonni ekotizimni sog‘lomlashtirish yo‘lidagi muhim qadam sifatida baholadi.
Kompaniya kelajakdagi o‘sishni sun’iy intellektga asoslangan yangi platforma bilan bog‘lamoqda. Bumble o‘zining eski texnologik infratuzilmasini bulutli va AI yordamida ishlovchi tizimga o‘tkazmoqda. Bu yangilanish foydalanuvchilarga bir-biriga mos keladigan nomzodlarni aniqroq tavsiya etish imkonini beradi.
Eng katta o‘zgarishlar joriy yilning to‘rtinchi choragida kutilmoqda. Bumble an’anaviy «swipe» (surish) modelidan voz kechib, foydalanuvchilarni real hayotda uchrashishga undaydigan yangi interfeysni taqdim etishni rejalashtirmoqda. Shuningdek, "Bee" nomli sun’iy intellekt yordamchisi foydalanuvchilarning xohish-istaklariga mos keluvchi juftliklarni topishda yaqindan ko‘maklashadi.
“Zamin”ni Telegramʻda oʻqing!
