AMD kompaniyasi AM5 platformasi uchun yangi oʻyin protsessori — Ryzen 7 7700X3D modelini taqdim etishga hozirlik koʻrmoqda. Ushbu yangi CPU katta hajmdagi kesh-xotiraga ega boʻlgan arzonroq variant sifatida bozorga chiqadi. Bu haqda Ixbt.com xabar beradi.
Yangi protsessor 8 ta yadro va 16 ta oqimga ega boʻlib, 96 MB L3 kesh-xotira bilan jihozlanadi. Uning maksimal takt chastotasi 4,5 GGs atrofida boʻlishi kutilmoqda, bu esa Ryzen 7 7800X3D modeliga nisbatan unumdorlikning taxminan 5 foizga pastroq boʻlishini anglatadi. Protsessorning quvvat sarfi 120 W darajasida saqlanib qoladi.
Asosiy ustunlik narx siyosatida boʻladi. Taxminlarga koʻra, Ryzen 7 7700X3D narxi 300 dan 350 dollargacha boʻladi. Taqqoslash uchun, hozirda Ryzen 7 7800X3D modeli AQShda 396 dollarga sotilmoqda.
Ushbu model AMD uchun geymerlar auditoriyasini kengaytirish imkonini beradi. Garchi koʻp tarmoqli vazifalarda Intel Core Ultra 7 (Arrow Lake) protsessorlaridan ortda qolsa-da, katta kesh-xotira tufayli u oʻyinlarda raqobatbardosh samaradorlikni namoyish etadi.
“Zamin”ni Telegramʻda oʻqing!
