Taniqli ekologik faol Erin Brokovich yangi missiyaga qoʻl urdi: u maʻlumotlar markazlari (data center) qurilishi va ularning yaqin atrofdagi jamoalarga taʻsiri borasida shaffoflikni oshirishni maqsad qilgan. Pacific Gas & Electric kompaniyasiga qarshi sud jarayoni orqali mashhur boʻlgan va Julia Roberts ijrosidagi film orqali tanilgan Brokovich yaqinda AQSH boʻylab maʻlumotlar markazlari xaritasini oʻz ichiga olgan veb-saytni ishga tushirdi. Bu haqda Techcrunch.com xabar beradi.
Veb-saytda ushbu xarita "shakllanish jarayonidagi loyiha" sifatida tavsiflangan boʻlib, unga mahalliy aholi vakillari tomonidan xabar qilingan maʻlumotlar markazlari kiritilmoqda. Brokovich oʻzining Substack postida aprel oyida maʻlumotlar markazlari bilan bogʻliq muammolar boʻyicha hisobotlar soʻraganidan soʻng, birinchi oyning oʻzida 4000 ga yaqin murojaat kelib tushganini maʻlum qildi.
"Shovqin, suv sarfi yoki kommunal toʻlovlarning oshishidan ham koʻra koʻproq uchraydigan eng asosiy xavotir — bu shaffoflik masalasidir," — deb yozadi faol. Uning taʻkidlashicha, murojaatlarning aksariyatida aynan shu soʻz bot-bot takrorlanmoqda. Aholi loyihalar haqida yetarli maʻlumotga ega emasligidan shikoyat qilmoqda.
Brokovich maʻlumotlar markazlari yoki AI texnologiyalariga butunlay qarshi emasligini, biroq loyihalarning amalga oshirilish uslubini tanqid qilishini qoʻshimcha qildi. U ruxsatnomalar olingandan keyingina eʻlon qilinadigan loyihalar, qoʻngʻiroqlarga javob bermaydigan dasturchilar va qoʻshnilar loyihadan xabar topmasidan oldin maxfiylik kelishuviga (NDA) qoʻl qoʻyadigan mahalliy amaldorlar tizimiga qarshi chiqmoqda.
“Zamin”ni Telegramʻda oʻqing!
