Болаларни турли зўравонликлардан ҳимоя қилиш борасида қатор ишлар амалга оширилмоқда. Аммо баъзан ижтимоий тармоқларда болалар ёки вояга етмаган қизларга нисбатан тегажоғлик қилиш, ёки Интернет орқали уларга уятсиз тасвирлар юбориш ҳолатлари кузатилмоқда. Энди бундай ҳолатлар учун жавобгарлик янада кучайтирилади, деб Ta’lim xabarlari хабар берди.
Олий Мажлис Қонунчилик палатасидаги сиёсий партиялар фракцияларининг йиғилишларида “Болаларни зўравонликдан ҳимоя қилиш тизимини такомиллаштириш муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун муҳокама қилинди.
Қонун лойиҳасига кўра, 16 ёшга тўлмаган шахсга нисбатан телекоммуникация тармоқлари ёки Интернет орқали уятсиз ҳаракатлар қилган шахсларга нисбатан жавобгарлик кучайтирилади. Шунингдек, вояга етмаганлар тасвирланган порнографик маҳсулотларни сақлаш ҳаракатини бир йил ичида қайта содир этганлар жиноий жавобгарликка тортилади.
Лойиҳанинг қабул қилиниши болаларни жинсий бузуқлик ва бола савдосига қарши жиноятлардан ҳимоя қилиш кафолатларини мустаҳкамлайди. Шу билан бирга, бундай жиноятларни содир этган шахслар қилмишига мос жазо олади ҳамда алимент тўламаслик учун маъмурий ёки жиноий жазога тортилган шахслар устидан жамоатчилик назорати ўрнатилади.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
