Европа Иттифоқи ва Марказий Осиё алоқалари расман стратегик шериклик даражасига кўтарилади, деб UzA хабар берди. Бугун, 4 апрель куни Самарқандда икки муҳим тадбир — “Team Europe” дастурининг эълон қилиниши ва иқлим форуми ўтказилиши режалаштирилган.
Европа комиссияси президенти Урсула фон дер Ляйен “Team Europe” дастурини тақдим этиши кутилмоқда. Ушбу дастур Марказий Осиёнинг сув, энергетика ва экологик лойиҳаларини молиялаштириш имконини яратади. Куннинг иккинчи ярмида эса президентлар иштирокида иқлим форуми бўлиб ўтади.
Саммит Марказий Осиёда сўнгги йилларда чегара масалалари ҳал этилган, интеграция ва яқинлашув кучайган, АҚШ Украина уруши борасида стратегик позициясини ўзгартирган даврда бўлиб ўтмоқда.
3 апрель куни Президент Шавкат Мирзиёев Самарқандга келган давлат раҳбарлари билан икки томонлама учрашувлар ўтказди. Саммитнинг асосий ютуқларидан бири — Европа Иттифоқи ва Марказий Осиё ўртасидаги муносабатларни стратегик шериклик даражасига кўтаришни назарда тутувчи “Самарқанд декларацияси” бўлади.
Урсула фон дер Ляйен “Team Europe” дастури доирасида Марказий Осиёдаги сув, энергетика ва экология соҳаларидаги лойиҳаларни молиялаштириш муҳим эканини таъкидлади. Унинг айтишича, бу дастур ЕИнинг савдо алоқаларини кенгайтириш ва АҚШ божхона сиёсатига жавоб сифатида кўрилмоқда.
Марказий Осиё давлатлари анъанавий равишда Хитой ва Россия билан рақамли ҳамкорлик қилиб келган бўлса-да, Европа Иттифоқи минтақадаги янги стратегик йўналиш сифатида намоён бўлмоқда.
Саммитда савдо-иқтисодий, транспорт-логистика, хавфсизлик ва Афғонистонни интеграция қилиш масалалари муҳокама қилинади. Европа Иттифоқи билан Ўзбекистон ўртасидаги савдо ҳажми 6 миллиард еврога етган. GSP+ мақоми натижасида Европага экспорт 4 бараварга ошган. Минтақада Европа компаниялари томонидан яшил энергетика ва инфратузилма соҳаларида йирик лойиҳалар амалга оширилмоқда. “Замин” янгиликларини “Telegram”да кузатиб боринг
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
