Тошкент ҳавоси яна қишдагидек ёмонлашди

6 апрель куни Тошкентда ҳаво сифати қиш мавсумидаги даражагача ёмонлашди, деб маълум қилмоқда Ўзгидромет, nova24.uz ёзади.

Маълумотларга кўра, PM2.5 микрочанг зарраларининг миқдори 76,4 мкг/м³ ни ташкил этди. Бу кўрсаткич ВОЗ тавсиясига нисбатан 15,3 баробар, миллий меъёрдан эса 2,2 баробар юқори.

РМ10 ва углерод оксиди (СО) бўйича ошиш қайд этилмади. Шу билан бирга, Учтепа туманидаги айрим маҳаллаларда ёниб кетган ҳид бўйича ижтимоий тармоқларда шикоятлар билдирилди. Мутасадди ташкилотларга текширув юритиш учун маълумот юборилди.

Шунингдек, ҳавода ифлосланишнинг тўпланишига паст булутли об-ҳаво, намлик ва шамолсизлик ҳам сабаб бўлгани таъкидланди.

12:00 ҳолатига кўра IqAir маълумотига кўра, PM2.5 миқдори 21 мкг/м³ ни ташкил этган – бу ВОЗ меъёридан 4,4 баробар юқори, аммо миллий меъёрга мос келади.