Ўзбекистонда лимон нархи ошиб кетиши мумкин

8 апрель 2025 йилдан бошлаб Туркия лимон экспорт қилишни вақтинча тўхтатди, деб nova24.uz хабар берди. Бу қарор мамлакатнинг ички бозорини қишлоқ хўжалигидаги совуқ ҳаволар таъсиридан ҳимоя қилиш мақсадида қабул қилинди.

Сўнгги пайтларда Адана, Мерсин ва Хатай вилоятларида совуқ об-ҳаво кузатилмоқда. Шу муносабат билан Туркия Қишлоқ хўжалиги ва ўрмон хўжалиги вазирлиги лимон экспортини тўхтатиш ҳақида қарор чиқарди. Зарур ҳолларда қўшимча чоралар ҳам кўрилиши мумкин.

Ўзбекистон 2024 йилда 16,5 минг тонна лимон импорт қилган, шундан 10 024 тоннаси Туркиядан келтирилган. Хитой (4 106 тонна) ва Тожикистон (1 230 тонна) кейинги ўринларда.

Қолган етказиб берувчилар:
Эрон – 499 тонна
Аргентина – 382 тонна
Бошқа мамлакатлар – 235 тонна

Умумий ҳисобда Туркия 2024 йилда 1,639 млн тонна цитрус мева экспорт қилган. Энг йирик харидорлар:
Россия – 375 млн доллар
Ироқ – 197 млн доллар
Украина – 108 млн доллар
Руминия – 49 млн доллар
Польша – 48 млн доллар