Ўзбекистонда заргарлик соҳасига янги имтиёзлар берилди

Президент Шавкат Мирзиёев заргарлик соҳасини қўллаб-қувватлашга қаратилган янги қонунни имзолади, деб "UzDaily.uz" хабар берди.

Қонунга мувофиқ, 2024 йил 1 сентябрдан 2027 йил 1 сентябргача "Ҳунарманд" уюшмаси аъзоларига амал қилаётган солиқ имтиёзлари энди "Ўзбекзаргарсаноати" уюшмасига аъзо бўлган ювелир маҳсулотлари ишлаб чиқарувчи якка тартибдаги тадбиркорларга ҳам татбиқ этилади.

Бундан ташқари, ушбу уюшмага кирувчи корхоналар ювелир ишлаб чиқаришда фойдаланиладиган бинолар ва ер участкалари учун мулк солиғи ҳамда ер солиғидан озод қилинади.

"Қимматбаҳо металлар ва тошлар тўғрисида"ги қонунга киритилган ўзгаришларга кўра, аффинаж корхоналари қўшимча рухсатномаларсиз қуйидаги ҳуқуқларга эга бўлади:
• Ювелир маҳсулотлари ишлаб чиқарувчиларга қимматбаҳо металларни эркин ҳажм ва кўринишда сотиш;
• Қимматбаҳо металлардан эсдалик тангалар тайёрлаш ва сотиш.

Шунингдек, ювелир маҳсулот ишлаб чиқарувчиларга яримтайёр маҳсулотларни бошқа ишлаб чиқарувчиларга сотишга рухсат берилади. Уларнинг нархини ўзи белгилайди, аммо у Лондон металл биржаси ва Марказий банкнинг расмий курси асосида белгиланган чегарадан паст бўлмаслиги шарт. «Замин»ни Telegram’да ўқинг!