Хоразмда канализация тизими янгиланади

2025 йилда Хоразм вилоятида сув таъминоти ва канализация тизимларини реконструкция қилиш ишлари бошланади, деб uz.kursiv.media хабар берди. Бу мақсадлар учун 1,1 трлн сўм ажратилади.

Ҳозирги кунда вилоятдаги сув таъминоти тармоқларининг 16% ва канализация тармоқларининг 27% авария ҳолатида. Айнан Урганч, Хива ва Питнак шаҳарларида бу муаммо кескин турибди.

Яқин вақт ичида ушбу учта шаҳар ва Гурлан туманида канализация тизимларини янгилаш ишлари бошланади.

Йил охиригача Хоразмда 101 км янги сув ва канализация тармоқлари қурилади. Шунингдек, канализация тизимини ривожлантириш учун халқаро ташкилотлардан 85 миллион доллар жалб этиш режалаштирилган.

Бундан ташқари, 2025 йилда пудрат ишлари учун 12 трлн сўм ажратилиб, 20 минг киши иш билан таъминланади. 200 та кўп қаватли уй қурилиши, 1,5 минг км йўл ва 20 та кўприк таъмирланиши режалаштирилган.

Жамоат транспортини яхшилаш мақсадида 80 та янги автобус харид қилиниб, 6 та янги маршрут йўлга қўйилади. «Замин»ни Telegram’да ўқинг!