Ўзбекистонда транспорт баҳоси янги тартибда аниқланади

Ўзбекистонда транспорт воситаларининг баҳосини аниқлаш тартиби ўзгартирилди, деб nova24.uz хабар берди.

Маълумотларга кўра, Ягона миллий баҳолаш стандартига транспорт воситаларини баҳолаш бўйича янги бўлим қўшилди. Энди шикастланган автомобиль баҳоси аниқланганда мутахассислар таъмирлаш харажатлари, етказилган зарар ҳамда товар қийматининг йўқотилишини ҳам ҳисобга олади.

Бозор қийматини аниқлашда уларни сотишга оид ташкилий ҳаражатлар инобатга олинмайди. Баҳолаш учун зарур маълумотларни тўплаш ва бозор маълумотларини йиғиш билан махсус мутахассис — баҳоловчи шуғулланади.

Ҳужжатда баҳоланадиган объект ҳақидаги асосий маълумот манбалари белгиланди:

• буюртмачи ёки бошқа ваколатли шахс томонидан тақдим этилган маълумотлар
• баҳоловчи томонидан объектни кўздан кечиришда олинган маълумотлар
• учинчи шахслар, ташкилотлар, оммавий ахборот воситалари ва интернетдан олинган маълумотлар

Объектни баҳолашда қиёсий, даромадли ва харажатли ёндашувлардан фойдаланиш белгиланган.

• Қиёсий ёндашув аналог объектлар нархига асосланади ва фарқларни ҳисобга олиб тузатиш киритилади.
• Даромадли ёндашув фойда келтирадиган объектнинг келажак даромадларига асосланади, бу ерда объект қиймати соф операцион даромадни капитализация ставкасига бўлиш билан топилади.
• Харажатли ёндашув эса транспорт воситасини қайта яратиш ёки алмаштириш қийматидан жами эскиришни айириш орқали баҳоланади.