Йўналишсиз таксиларга чеклов — Конституцияга зид!

Тошкент шаҳрида йўналишсиз такси фаолияти бўйича жорий қилинган чекловлар жамоатчиликда кенг муҳокама ва эътирозларга сабаб бўлмоқда, деб xdp.uz хабар берди.

Янги тартибга кўра, ҳар бир ҳайдовчи фақат ўз ҳудуди ва унга туташ ҳудуддагина такси хизмати кўрсата олади. Бироқ бу тартиб Ўзбекистон Республикаси Конституциясининг 67-моддасига зид ҳисобланади.

Конституцияга кўра, давлат инвестиция ва ишбилармонлик учун қулай муҳитни таъминлаши ҳамда иқтисодий макон бирлиги ва меҳнат ресурслари эркин ҳаракатини кафолатлаши шарт.

Йўналишсиз такси фаолиятини чеклаш — фуқароларнинг конституциявий меҳнат ҳуқуқларини бузиши, уларни ўзини ўзи банд қилиш орқали қонуний фаолият олиб бориш имкониятини чеклаш ҳисобланади.

42-моддада ҳар ким меҳнат қилиш, касб танлаш ва ишсизликдан қонун доирасида ҳимояланиш ҳуқуқига эга экани белгиланган.

Шу боис, Ўзбекистон Халқ демократик партияси фракцияси бу масала юзасидан Транспорт вазирига расмий сўров юборди ва масала парламент муҳокамасига чиқарилиши учун вазирни Ҳукумат соатига таклиф этди.