Ўзбекистон Каспий денгизи орқали паром йўлларини очмоқчи

Ўзбекистон Каспий денгизи орқали юк ташишни жадаллаштириш мақсадида ўз паромларини йўлга қўйишни режалаштирмоқда, деб uz.kursiv.media хабар берди.

Бу ҳақда Транспорт вазири Илхом Маҳкамов “Ўзбекистон 24” телеканалига берган интервьюсида маълум қилди. Унинг айтишича, мазкур ташаббус юк ташишларни тезлаштиради.

Маҳкамов таъкидлашича, паром йўналишларини ишга туширишда Туркиялик ҳамкорлар жалб этилади. Шунингдек, Хитойдан Ўзбекистонга қурилаётган темир йўл лойиҳаси ўзбек-озарбайжон транзитига ижобий таъсир кўрсатади.

Эслатиб ўтамиз, ўтган йил ёзида Озарбайжон президенти Илҳом Алиев Ўзбекистон билан денгиз юк ташиш соҳасини ривожлантириш ташаббусини билдирган. У президент Шавкат Мирзиёевга Қора денгиз орқали юк ташиш лойиҳасига қўшилишни таклиф қилган.

Тошкент бугунгача ҳам Каспий денгизида ўз денгиз флотига эга бўлиш ниятини билдириб келган. Ўзбекистон байроғи остидаги кемалар орқали “Ўрта коридор” бўйича юк ташиш ҳажми ошиши кутилмоқда. «Замин»ни Telegram’да ўқинг!