TBC Bank гуруҳи OLX Uzbekistan онлайн эълонлар сервисининг назорат пакетини сотиб олиш бўйича келишувни эълон қилди, деб Kursiv хабар берди.
Бу харид учун TBC Bank халқаро инвесторлар қўллаб-қувватлаган Titan Investments холдинги билан қўшма корхона тузди. Акциялар OLX Group'дан сотиб олинади, ушбу гуруҳ Prosus таркибига киради.
Тузилган келишувга кўра, TBC Bank 50% + 1 дона акцияга эгалик қилади, қолган улуш Titan Investments'га тегишли бўлади. Ҳозирда шартномани расмийлаштириш учун регуляторлар розилиги кутилмоқда.
TBC Bank маълум қилишича, Prosus билан тузилган шартнома банкка OLX UZ орқали янги мижозлар сегментига чиқиш имконини беради. OLX Uzbekistan сайти мамлакатдаги энг кўп ташриф буюриладиган 6-сайт ҳисобланади.
Айни пайтда OLX Uzbekistan’да ойига 5,4 миллион фаол фойдаланувчи ва 2,2 миллион фаол эълон мавжуд. OLX бренди Ўзбекистонда ўз номи билан фаолият юритишда давом этади.
TBC Bank сервисни ўз экотизимига интеграция қилишни режалаштирмоқда. Бу эса рақамли хизматлар доирасини янада кенгайтириш имконини беради.
«Замин»ни Telegram’да ўқинг!
