Тошкент шаҳар йўловчи транспортида назорат янада кучайтирилди. Транспорт назорати инспекцияси ва йўловчи транспорти назорат бошқармаси ходимлари ҳамкорлигида автобусларда рейдлар мунтазам ўтказилмоқда. Бу ҳақда масъул идоралар маълум қилди.
Йил бошидан бери пойтахтда олти мингдан ортиқ йўловчи чиптасиз саёҳат қилгани учун ушланган. Ҳар бир ҳолат юзасидан маъмурий баённома расмийлаштирилган.
Маълумотларга кўра, жарима миқдори БҲМнинг 1/10 қисми — 41 200 сўмни ташкил этади. Бу эса автобус йўл ҳақи — 1 700 сўмдан қарийб 25 баравар қиммат ҳисобланади.
Қизиғи шундаки, январдан августгача бўлган 7 ойда салкам 4 минг йўловчи қоидабузарлик қилган бўлса, кейинги бир ярим ойнинг ўзида 2 мингдан ортиқ “қуён” аниқланган. Бу ҳолат йўл ҳақини тўламаслик ҳолатлари ортиб бораётганидан далолат бермоқда.
Шу билан бирга, қонунбузарлик такрорланганда жавобгарлик янада оғирлашади. Маъмурий жавобгарлик кодексининг 144-моддасига мувофиқ, йўловчининг чиптасиз саёҳати учун уч БҲМ — яъни 1 236 000 сўм миқдорида жарима белгиланган.
Мутасаддилар таъкидлашича, назорат тадбирлари давом этади ва барча йўловчилардан йўл ҳақини ўз вақтида тўлаш қатъий талаб қилинади.
«Замин»ни Telegram’да ўқинг!
