Қозоғистоннинг Олмаота вилоятида юз берган мудҳиш портлаш бутун жамоатчиликни изтиробга солди. Жорий йил 11 сентябрь куни Или тумани, Байсерке қишлоғида жойлашган LGN Metal корхонасида содир бўлган портлаш оқибатида уч нафар Ўзбекистон фуқароси ҳаётдан кўз юмди. Бу ҳақда Миграция агентлиги расмий баёнот берди.
Агентлик марҳумларнинг оила аъзолари ва яқинларига чуқур таъзия изҳор этар экан, уларга сабр-қаноат тилади. Шу билан бирга, ҳодиса жамоатчиликда катта қайғу уйғотгани таъкидланди.
Расмий маълумотларга кўра, воқеа юзасидан Или тумани полицияси томонидан жиноят иши қўзғатилган. Тергов меҳнат муҳофазаси қоидалари бузилиши натижасида инсонларнинг ўлимига олиб келган ҳолат сифатида кўриб чиқилмоқда. Ҳозирда махсус комиссия иш олиб бормоқда, ҳодисанинг барча жиҳатлари ўрганилмоқда.
Ўзбекистон Республикаси Миграция агентлиги эса ўз фуқароларининг жасадларини юртга олиб келиш учун зарур ҳужжатларни расмийлаштириш ишларини жадал ташкил этган. Шунингдек, ҳудудий агентлик ходимлари марҳумларнинг оилалари билан доимий мулоқотда бўлиб, уларга амалий ва маънавий ёрдам кўрсатмоқда.
Маълум қилинишича, ҳозирда Ўзбекистон ва Қозоғистоннинг масъул идоралари ўртасида ҳамкорлик йўлга қўйилган. Тергов жараёнининг бориши қатъий назорат остида сақланмоқда.
Мутахассислар таъкидлашича, бу каби фожеалар меҳнат хавфсизлиги масаласига янада жиддий эътибор қаратиш зарурлигини кўрсатади. Жамоатчилик эса ҳалок бўлган ўзбек ишчилари жасадлари юртга қайтарилиши уларнинг оилалари учун кичик бўлса-да, юракларни тинчлантиради, деб ҳисобламоқда.
«Замин»ни Telegram’да ўқинг!
