Ҳукумат қарори билан «Ёшларни хорижий тилларни ўқув марказларида ўрганиш харажатларини қисман қоплаш учун субсидиялар бериш тартиби тўғрисидаги низом» тасдиқланди, деб хабар берди UzNews.uz.
Низомга кўра, «2+6» дастури жорий этилади — унга кўра, хорижий тил бўйича камида базавий сертификатга эга бўлган ёшлар дастлабки 2 ойни ўз маблағи ҳисобидан тўлайди.
Шундан сўнг, агар ўқиш давом эттирилса, кейинги 6 ой учун давлат субсидияси ажратилади. Бу маблағлар Ёшлар ишлари агентлиги ҳузуридаги Давлат ёшлар сиёсати қўллаб-қувватлаш жамғармаси ҳисобидан берилади.
Ҳар ойда субсидия миқдори қуйидагича белгиланган:
• Тошкент шаҳрида — 2 БҲМгача;
• вилоят марказлари ва Қорақалпоғистон Республикасида — 1,5 БҲМгача;
• туманларда — 1 БҲМгача.
Ёшлар ишлари агентлиги маълум қилишича, 2025–2026 йилларда 20 минг нафар ёшга субсидия ажратилади. Шунингдек, 2031 йилгача ҳар йили яна 20 минг нафар иштирокчига давлат ёрдами тақдим этилади. Агар йил давомида лимитдан ошиб кетилса, субсидия тўловлари кейинги йилгача тўхтатилади.
Субсидиялар фаолият юритаётган ва рейтинг платформасига рўйхатдан ўтган, шунингдек, электрон дарсга қатнашувни кузатиш тизимига уланган ўқув марказларига берилади.
“Zamin”ни Telegram'да ўқинг!
