Жиноят-ижроия кодексига киритилган янги ўзгартишлар маҳкумлар учун мулоқот имкониятларини кенгайтирмоқда. Янги қонунга кўра, озодликдан маҳрум этилган шахсларга яқинлари билан масофадан туриб видеоучрашув қилиш ҳуқуқи берилди. Тегишли ҳужжат 2026 йил 15 январь куни қабул қилинган бўлиб, расмий эълон қилинган кундан бошлаб кучга киради.
Қонун талабларига мувофиқ, маҳкумлар ўз шахсий маблағлари ҳисобидан тўланадиган, 15 дақиқа давом этадиган бир марталик масофали видеоучрашув ёки телефон орқали суҳбатлашиш имкониятига эга бўлади. Бу қадам, аввало, маҳкумларнинг оила аъзолари ва яқинлари билан алоқасини узиб қўймасликка қаратилган.
Аввалги тартибда эса бундай мулоқот фақат 15 дақиқалик бир марталик телефон қўнғироғи билан чекланган эди. Эндиликда видеомулоқот ҳам қонуний асосда мустаҳкамланиб, маҳкумга қўшимча вариант сифатида тақдим этилмоқда.
Мутахассислар фикрича, масофали видеоучрашувларни жорий этиш маҳкумларнинг ижтимоий боғлиқлигини сақлаш, руҳий барқарорликни қўллаб-қувватлаш, шу билан бирга жазони ижро этиш тизимида замонавий технологиялардан фойдаланишни янада кенгайтиришга хизмат қилиши кутилмоқда.
“Zamin”ни Telegram'да ўқинг!
