Хорватиянинг Верне компанияси Загреб шаҳрида Европадаги илк роботакси хизматини синовдан ўтказмоқда. Лойиҳа Uber ва автоном бошқарув технологиялари бўйича етакчи бўлган Pony.ai компанияси билан ҳамкорликда амалга оширилмоқда. Ҳозирда шаҳарда 10 та ҳайдовчисиз автомобил чекланган фойдаланувчилар учун хизмат кўрсатмоқда. Бу ҳақда Ixbt.com хабар беради.
Синов босқичида хавфсизликни таъминлаш мақсадида ҳар бир автомобилда оператор-ходим ўтирибди. У рул бошқарувига бевосита аралашмайди, фақат фавқулодда вазиятларда назоратни ўз қўлига олади. АФП агентлиги журналистлари ўтказган тест сафарида тизим кутилмаган тўсиқларга дуч келган бўлса-да, автоматлаштирилган тизим хавфсиз тўхташни амалга оширишга муваффақ бўлди.
Верне маълумотларига кўра, айни пайтда 300 га яқин йўловчи ушбу хизматдан фойдаланмоқда ва уларнинг 90 фоизи сафар сифатини юқори баҳолаган. Роботаксилар камера, лидар ва радар сенсорлари ёрдамида атроф-муҳитнинг уч ўлчамли моделини яратиб, реал вақт режимида қарор қабул қилади. Ҳозирда хизмат Загреб маркази, жанубий туманлар ва аэропорт ҳудудида ишламоқда.
Ҳозирги вақтда сафар нархи 1,99 еврони ташкил этади, бироқ бу вақтинчалик нарх ҳисобланади. Компания 2026-йил охирига қадар тўлиқ ҳайдовчисиз бошқарувга ўтишни режалаштирмоқда. Верне келгусида Европа Иттифоқи, Буюк Британия ва Яқин Шарқнинг 11 та шаҳрида ҳам ўз хизматларини кенгайтириш бўйича музокаралар олиб бормоқда.
“Zamin”ни Telegram'да ўқинг!
