Хитойда инсоний роботлар саноатининг жадал ривожланиши ягона стандартлар йўқлиги муаммосига дуч келди. Турли ишлаб чиқарувчилар ўзаро мос келмайдиган платформалардан фойдаланаётгани сабабли маълумотлар синхронизацияси, сифат назорати ва хавфсизликни таъминлаш қийинлашмоқда. Шу боис Хубей провинцияси ушбу қурилмалар учун «рақамли шахсни тасдиқловчи ҳужжат» тизимини синовдан ўтказишни бошлаган биринчи ҳудудга айланди. Бу ҳақда Ixbt.com хабар беради.
Ҳар бир роботга ўзига хос ИД рақами берилади, у худди паспорт вазифасини ўтайди. Ушбу рақам таркибига мамлакат ва ишлаб чиқарувчи коди, қурилма модели ҳамда индивидуал серия рақами киритилади. Шунингдек, тизимда роботнинг техник хусусиятлари, «интеллект» даражаси ва завод рўйхатидан ўтганлиги ҳақидаги маълумотлар сақланади.
Янги платформа қурилманинг ҳолатини реал вақт режимида кузатиш имконини беради. Бунда бўғинларнинг эскириши, батарея қуввати, вазифаларни бажариш аниқлиги ва техник хизмат кўрсатиш тарихи назорат қилинади. Бу тизим носозликларни тезда аниқлаш, таъмирлаш жараёнини соддалаштириш ва эксплуатация шаффофлигини оширишга хизмат қилади.
Роботларни қайта текширувларсиз турли платформалар ва иш жараёнларига ўтказиш имконияти жорий этилмоқда, бу эса харажатларни сезиларли даражада камайтиради. Ҳозирда тажриба дастурида маҳаллий компаниялар ва тадқиқот марказлари иштирок этмоқда. Стандартлар тасдиқлангач, тизим саноат миқёсида кенг қўлланилиб, роботларни мажбурий «ҳисобга қўйиш» тартиби жорий этилади.
“Zamin”ни Telegram'да ўқинг!
