Time журнали Путин ва Зеленскийни дунёнинг энг кучли таъсирга эга одамлари рўйхатига киритди

^{Фото: EPA}
Британиянинг Time журнали Россия президенти Владимир Путин ва Украина президенти Володимир Зеленскийни дунёнинг энг кучли таъсирга эга 100 одами рўйхатига киритди.

Владимир Путин тўғрисидаги матнни колонияда жазо ўтаётган мухолифатчи Алексей Навалний ёзди. Навалнийнинг фикрича, Путиннинг «ҳақиқий миссияси» — барчага: жаҳон етакчиларидан тортиб оддий одамларгача сабоқ бериш. У ғарб раҳбарлари Путиннинг Россия ичидаги сиёсатига қарамасдан у билан халқаро форумларда мулоқот қилгани ва янги энергетика шартномалари имзолаганига эътибор қаратди. «Путин бизга «ўрдак ҳақидаги тест»ни эслатди: агар нимадир ўрдакка ўхшаса, ўрдакдек сузса ва ўрдакдек сайраса – у ўрдак бўлиши мумкин», — дея хулоса қилган Навалний.

Зеленский тўғрисидаги матнни АҚШ президенти Жо Байден ёзди. Унинг фикрича, Украина аҳолиси Зеленский қиёфасида «ўз жасорати ва матонатларига мос раҳбарни топишган». «Ҳар сафар гаплашганимизда, президент Зеленскийнинг овозида ўз халқи олдидаги бурчига ишонадиган ва шундай қоронғи вақтда ўз халқини олдинга бошловчи тантанали масъулиятини ҳар куни бажарадиган чарчоқ билмас қатъиятли инсон овозини эшитаман», — деб ёзди Байден.

Байденнинг ўзи ҳам Time рўйхатидан жой олди, у ҳақдаги матнни собиқ президент Билл Клинтон ёзди. Шунингдек, Time рўйхатига комик Жо Роган, ХХР раиси Си Цзинпин, Еврокомиссия раиси Урсула фон дер Ляйен, Германия канцлери Олаф Шолц, Украина қуролли кучлари бош қўмондони Валерий Залужний ва Чилининг 36 ёшли президенти Габриэл Борич киритилди.

Улардан ташқари, «Новая газета» бош муҳаррири Дмитрий Муратов, хонанда Адел, актёр Киану Ривз, теннисчи Рафаэл Надал, Apple раҳбари Тим Кук ва Европа марказий банки президенти Кристин Лагард ҳам дунёнинг энг кучли таъсирга эга одамлари рўйхатидан жой олди. “Замин” янгиликларини “Инстаграм”да кузатиб боринг