«Тинчликка ҳеч қандай умид кўрмадим» — Италия бош вазири Драги Путин билан суҳбати ҳақида

^{Фото: Getty Images}
Италия бош вазири Марио Драгининг айтишича, у Россия президенти Владимир Путин билан телефон мулоқоти давомида «тинчликка ҳеч қандай умид кўрмаган». Драги бу ҳақда журналистнинг саволига жавобан гапирди.

26 май куни Драгининг Путин билан бўлиб ўтган суҳбатида, аввало, Украинадан дон етказиб беришнинг тўсиб қўйилиши сабаб юзага келаётган глобал озиқ-овқат инқирози хавфи ҳақида гап кетган.

Драгининг сўзларига кўра, Путин Украина портлари Киевнинг айби билан тўсиб қўйилганини, украиналиклар гўёки портларга олиб борадиган йўлларни миналаштирганини айтган. Италия бош вазири вазиятни сув ҳудудини тозалаш ва Россиянинг портларга ҳужум қилмаслик ҳақидаги кафолати билан ҳал қилиш мумкин, деб ҳисобламоқда.

Кремлнинг баёнотига кўра, Путин Драгига «Россия Ғарбнинг сиёсий мотивларга асосланган чекловларини олиб ташлаши шарти билан дон ва ўғит экспорти орқали озиқ-овқат инқирозини енгишга улкан ҳисса қўшишга тайёрлигини» айтган.

Драги апрель бошида Corriere della Sera нашрига берган интервьюсида Путин билан телефон суҳбатларини «фойдасиз» деб ҳисоблай бошлаганини айтганди. У Путиндан ўт очишни тўхтатиш бўйича музокаралар олиб боришни сўраганда, Россия президенти «Ҳали вақти келмади» деб жавоб қайтарган. “Замин” янгиликларини “Инстаграм”да кузатиб боринг