Байден ва Зеленский Францияда Украинадаги вазиятни муҳокама қилади

^{Фото: AP}
АҚШ президенти Жо Байден Украина президенти Володимир Зеленский билан Францияда иттифоқчиларнинг Нормандияга қўнгани 80 йиллигига бағишланган маросимларда учрашишни режалаштирмоқда. Бу ҳақда АҚШ президентининг миллий хавфсизлик бўйича маслаҳатчиси Жейк Салливан 4 июн куни кечқурун Парижга парвоз қилган Air Force One самолёти бортида маълум қилди.

Салливаннинг сўзларига кўра, Байден Зеленский билан Украинадаги вазият ва Қўшма Штатлар Киевни қўллаб-қувватлашни қандай давом эттириши ҳамда кучайтириши мумкинлигини муҳокама қилмоқчи. Маслаҳатчининг қўшимча қилишича, Америка ва Украина президентлари навбатдаги шахсий учрашуви келаси ҳафта – Италиядаги G7 саммитида бўлиб ўтиши керак.

Украина Россиядаги ҳарбий нишонларга зарба бериш учун Америка қуролларидан фойдаландими, деган саволга Салливан Украина қуролли кучлари номидан гапиришни истамаслигини айтди. Унинг аниқлик киритишича, Вашингтон Украина аскарларини тайёрлаш учун Украинага ҳарбий маслаҳатчилар ёки инструкторлар юборишни режалаштирмаяпти.

Володимир Зеленский 6 июн куни Францияга икки кунлик расмий ташриф билан келади. Шу куни у ерда иттифоқчиларнинг Нормандияга қўнгани 80 йиллигига бағишланган тантаналар ўтказилади. 7 июн куни Украина етакчисини Елисей саройида Франция президенти Эммануэл Макрон қабул қилиши кутилмоқда. Макрон байрамдан кейин Жо Байден билан шахсан учрашиши ҳам режалаштирилган.

Россия 6 июн куни Францияда ўтказиладиган хотира тадбирларида иштирок этишга таклиф қилинмади.

Байден Украинанинг НАТОга қўшилиши ҳақида

Бир кун аввал, 4 июн куни Time журнали Жо Байден билан интервюсини эълон қилди, 28 май куни бўлиб ўтган суҳбатда Байден, хусусан, НАТО у президент лавозимини эгаллаган пайтдагидан анча кучли эканлигини айтди. Шу билан бирга, Россиянинг Украинага қарши урушидаги «тинчлик», унинг сўзларига кўра, «Россия ҳеч қачон Украинани босиб ололмаслиги» кафолатини англатиши керак. «Ва бу Украина НАТОнинг бир қисми эканлигини англатмайди. Бу дегани, биз улар билан, шунингдек, қурол-яроғ етказиб берадиган бошқа давлатлар билан ҳам муносабатларни давом эттирамиз, шунда улар келажакда ўзларини ҳимоя қила олади», - дея таъкидлади АҚШ президенти.

Аввалроқ Жо Байден ўз сайловолди тадбирлари туфайли Володимир Зеленскийнинг таклифини қабул қила олмаслигини ва Швейцариядаги Украина бўйича тинчлик саммитида шахсан иштирок эта олмаслигини айтган эди. Ушбу анжуманда Қўшма Штатлар томонидан вице-президент Камала Харрис ва Жейк Салливан иштирок этади.

Янгиликлар