АҚШдаги шов-шувли қотилликни содир этишда гумонланган шахс қўлга олинди

^{Фото: Business Insider}
АҚШ полицияси UnitedHealthcare тиббий суғурта компаниясининг ижрочи директори Брайан Томпсонни ўлдиришда гумонланган шахсни қўлга олди, деб хабар беради CNN.

Ню-Йорк полиция комиссари Жессика Тишнинг маълум қилишича, 26 ёшли Луижи Манжионе ноқонуний қурол сақлаш айблови бўйича қўлга олинган. Манжионе «Брайан Томпсонни ўлдиришда» гумонланмоқда.

Ню-Йорк мэри Эрик Адамсга кўра, қўлга олинган шахс полиция томонидан қидирувда бўлган инсоннинг «таърифига мос келади». «Шунингдек, [гумонланувчининг] ёнидан уни қотиллик ҳолатига боғлаши мумкин бўлган бир нечта буюмлар топилган», — дейди мэр.

Қўлга олинган шахснинг ёнида «корпоратив Америка» ҳақида салбий фикр билдирган муаллифнинг қўлёзмаси топилгани айтилмоқда. Ҳужжатни кўрган полициячи ундан иккита иқтибос келтирган: «Бу паразитлар шундай йўл тутди» ҳамда «Ҳар қандай баҳс ва жароҳатлар учун кечирим сўрайман, аммо бу содир бўлиши керак эди».

CBS News ўзининг терговга яқин манбасига таяниб ёзишича, Томпсонни ўлдиришга гумонланаётган шахс Алтунада ҳибсга олганидан кейин, Пенсилвания расмийлари томонидан сўроы қилинган. Манбанинг сўзларига кўра, қўлга олинган шахснинг ёнидан овоз сўндиргичга эга пистолет топилган — бу Томпсон ўлдирилган қуролга мос келади.

Нашрнинг ҳуқуқ-тартибот органларидаги икки манбасини айтишича, «Макдоналдс» ресторанига ташриф буюрган мижозлардан бири Ню-Йорк полицияси томонидан қидирлаётган эркакка ўхшаш шахсга дуч келганидан кейин Пенсилвания полициясига қўнғироқ қилган. Ҳозирда терговчилар унинг Брайан Томпсонга уюштирилган суиқасдга алоқадорлигини исботлаш учун иш олиб бормоқда.

4 декабр куни Манхэттенда 2023 йилда даромади 281 млрд долларни ташкил этган UnitedHealthcare суғурта компаниясининг ижрочи директори Брайан Томпсон отиб кетилганди. Полиция қотилни бир неча кундан бери қидириб келаётган, жиноятчи ҳақида маълумот берганларга 10 минг доллар ваъда қилинган эди.

Янгиликлар