Чекишни ташлашга ёрдам берадиган илова ишлаб чиқилди

^{Фото: Getty Images}
Буюк Британиянинг Бристол университети тадқиқотчилари ақлли соатлар учун янги илова ишлаб чиқди. У чекишга оид хатти-ҳаракатларни таниб олиш ва фойдаланувчига ўз вақтида қўллаб-қувватловчи хабарлар юбориш қобилиятига эга. Фойдали дастур одамларнинг ўз одатларига онгли ёндашувини таъминлашга ёрдам бериб, уларнинг чекишни ташлаш имкониятини оширади.

Илова ақлли соатнинг ички ҳаракат сенсорларидан фойдаланиб, чекиш пайтидаги қўлнинг ўзига хос ҳаракатларини аниқлайди. Соат бундай ҳаракатларни қайд этганда, илова фойдаланувчига сигаретадан воз кечишга ундовчи хабарлар юборади.

Синов тадқиқотида 18 нафар иштирокчи икки ҳафта давомида иловадан фойдаланди. Ақлли соатлар иштирокчиларга ўз одатларини англаб етишга, улар ҳақида чуқурроқ ўйлашга ва чекишни ташлашга бўлган интилишларини кучайтиришга ёрдам берди.

“Илованинг асосий хусусияти бу — шахсийлаштирилган ёндашув. Фойдаланувчилар айнан чекиш истаги пайдо бўлган вақтда билдиришнома олади”, — деди Бристол университети катта илмий ходими Кристофер Стоун.

Дастур иштирокчиларининг учдан икки қисми ушбу иловани фойдали ва қулай деб баҳолади. Иловани смартфонга улаш шарт эмас, ақлли соатнинг ўзида тўлиқ ишлайди.

“Чекиш саратон хавфининг асосий омили бўлиб қолмоқда ва бу одатдан воз кечиш саломатлик учун энг яхши қадамдир. Смарт-соатлар муҳим ресурсга айланиши мумкин, аммо уларнинг узоқ муддатли самарадорлигини баҳолаш учун кейинги тадқиқотлар зарур”, — деди Cancer Research UK вакили Ализе Фрогелд.

Фрогелд чекишни ташлаш учун ёрдамчи дастурларга мурожаат қилиш муҳимлигини алоҳида таъкидлади. У бундай дастурлар билан ҳамкорлик қилиш чекишни ташлашда муваффақиятга эришиш имкониятини сезиларли даражада оширишга ёрдам беришини айтди.

Тадқиқот гуруҳи бундай ёндашувнинг самарадорлигини тасдиқлаш мақсадида кенг қамровли узоқ муддатли изланишлар ўтказишни режалаштирмоқда. Ушбу ташаббус чекишнинг салбий оқибатларига қарши курашиш ва соғлом турмуш тарзини тарғиб қилиш йўлидаги муҳим қадам бўлади. «Замин» янгиликларини «Вконтакти»да кузатиб боринг