Франция мудофаа вазири Себастян Лекорню Украинага биринчи «Mirage 2000» қирувчи самолёти етказилганини маълум қилди. Бу самолётни Францияда бир неча ой тайёргарликдан ўтган украиналик учувчилар бошқаради.
Янгиланган «Mirage 2000»
Самолёт модернизация қилинган бўлиб, у замонавий ускуналар, янги радиоэлектрон уруш тизимлари ва «ҳаво-ер» ракеталари билан жиҳозланган.
Макроннинг ваъдаси ва таъминот ҳажми
Франция президенти Эммануэл Макрон 2024 йил июнь ойида Украинага «Mirage 2000-5» қирувчи самолётларини беришга тайёрлигини айтган, бироқ уларнинг аниқ сонини ошкор қилмаган.
La Tribune нашри маълумотларига кўра, Франция ушбу самолётларни чекланган миқдорда етказиб беради. Мамлакат кўпи билан олти қирувчи ажратиши мумкин, чунки Франциянинг мавжуд 26 та самолётидан 20 таси фаол эскадрон таркибида. Таъминот ҳажмини ошириш учун бошқа давлатларни жалб қилиш режалаштирилган бўлиб, умумий етказиб бериладиган самолётлар сони 12 дан ошмаслиги кутилмоқда.
Мутахассис фикри
Украиналик ҳарбий эксперт Александр Коваленко The Insider нашрига берган шарҳида «Mirage 2000-5» самолётларини техник хизмат кўрсатиш ва таъмирлаш маълум мураккабликлар туғдириши мумкинлигини таъкидлади. Аммо у учиш хусусиятлари бўйича Американинг F-16 ҳамда Украинанинг Су-24 самолётларидан устун эканини қайд этди. “Замин” янгиликларини “Telegram”да кузатиб боринг
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
