Европа Украинада тинчлик шартномасисиз ўт очишни тўхтатишга қарши

^{Фото: Reuters}
Франция, Германия, Буюк Британия, Полша, Италия, Испания ва Дания раҳбарлари яқинда Парижда бўлиб ўтган режадан ташқари саммитда келажакда Украина учун хавфсизлик кафолатларини беришга тайёр эканини тасдиқлади. Бироқ Европанинг бу борадаги кейинги қадамлари АҚШнинг ҳаракатларига боғлиқ бўлади. Бу ҳақда 18 феврал, сешанбага ўтар кечаси Париждаги инқирозли учрашувда муҳокама қилинадиган мавзулар билан таниш бўлган европалик дипломатлардан бирига таяниб, Reuters агентлиги хабар берди.

«Биз хавфсизлик кафолатларини тақдим этишга тайёрмиз, унинг шартлари Америка қўллаб-қувватлаш даражасига қараб ҳар бир томон билан кўриб чиқилади», — дея манбанинг сўзларидан иқтибос келтиради агентлик.

Дипломатнинг сўзларига кўра, Европа етакчилари Украинада тўлиқ тинчлик келишуви имзоланмасдан амалга оширилса, ўт очишни тўхтатиш тўғрисидаги келишув эҳтимоли хавфига ҳам эътибор қаратган.

Лондон Европа Иттифоқини «ўз хавфсизлиги учун жавобгарликни зиммасига олишга» чақирди

Париждаги саммитнинг асосий мавзуси АҚШнинг Украинага нисбатан сиёсатидаги кескин ўзгаришларга Европа қандай жавоб бериши кераклиги масаласи бўлди. АҚШ президенти Доналд Трамп вакиллари Киевни бу ҳақда огоҳлантирмасдан, Россиянинг Украинага қарши уруши тугашини Кремл билан бевосита муҳокама қила бошлади ва Вашингтон томонидан Украинанинг нодир металларини назорат қилиш учун таклиф қилинган шартлар мамлакат учун хавфсизлик кафолатларини ўз ичига олмаган.

Саммит якунлари бўйича ҳеч қандай расмий баёнот берилмади, бироқ унинг иштирокчилари кейинроқ ОАВга изоҳ тақдим этди. Шу тариқа, Полша бош вазири Доналд Туск йиғилишнинг барча иштирокчилари ҳозирги вазият бўйича «ўхшаш қарашларга эга» эканини маълум қилди, бироқ нима муҳокама қилинаётганига аниқлик киритмади.

Ўз навбатида, Буюк Британия бош вазири Кир Стармер Европа Иттифоқи давлатларини «янги даврга кириб бораётганимизни тан олишга ва ўтмишдаги қулайликларга умидсиз ёпишиб қолишни бас қилишга» чақирди.

«Биз ўз хавфсизлигимиз, қитъамиз учун масъулиятни ўз зиммамизга олиш вақти келди», деди вазир. Бироқ Киев Вашингтоннинг қўшимча ёрдамига муҳтож, деди у, «чунки фақат АҚШ хавфсизлик кафолатлари Россияни Украинага янги ҳужумдан самарали тарзда тўхтата олади». “Замин” янгиликларини “Telegram”да кузатиб боринг