Келлоггнинг Зеленский билан учрашгандан кейин биринчи баёноти

^{Фото: Reuters}
АҚШ президенти Доналд Трампнинг Украина ва Россия бўйича махсус вакили Кит Келлогг Киевда Украина президенти Владимир Зеленский билан учрашувдан сўнг илк баёнотини берди. У кунни мамлакат олий раҳбарияти билан мулоқотда ўтказганини таъкидлади.

«Украина олий раҳбарияти билан узоқ ва тўлақонли мулоқот куни. Урушдаги мамлакатнинг жасоратли раҳбари Владимир Зеленский ва миллий хавфсизликни таъминлаган истеъдодли жамоаси билан кенг ва ижобий муҳокамалар бўлди», деб ёзди у ижтимоий тармоқда.

Келлоггнинг сўзлари Зеленскийнинг Киевда у билан учрашгандан кейинги биринчи баёнотига жавоб бўлди. Украина президенти сўзларига кўра, Трампнинг махсус вакили билан учрашув мамлакат АҚШ билан ҳамкорликни давом эттиришига «умидни тиклади».

«Генерал Келлогг билан биз фронтдаги вазиятни, Россияда сақланаётган барча ҳарбий асирларимизни озод қилиш зарурлигини ва аниқ, ишончли хавфсизлик кафолатлари тизими зарурлигини муҳокама қилдик - бу уруш ҳеч қачон қайтмаслигини ва Россия энди одамларни ҳаётдан маҳрум этмаслигини таъминлайди», деди Зеленский ижтимоий тармоқда.

19 февраль куни АҚШ президенти Доналд Трампнинг Украина ва Россия бўйича махсус вакили Кит Келлогг Киевга ташриф буюриб, президент Зеленский билан учрашди. Томонлар мулоқот якунига кўра матбуот анжуманида иштирок этиши лозим эди. Бироқ тадбир номаълум сабабларга кўра ўтказилмади.

Аввалроқ Украина президенти АҚШ махсус вакили Келлогг Киевга ташрифи чоғида Украина фуқаролари ва ҳарбий хизматчилари билан урушни тугатиш масаласида Вашингтоннинг тўғри позициясини аниқлаши кераклиги ҳақида маълум қилганди. Зеленский сўзларига кўра, Келлоггнинг ўзи Киев ва бошқа шаҳарларни кезиб, халқ билан шахсан мулоқот қилиши муҳим. “Замин” янгиликларини “Telegram”да кузатиб боринг