АҚШ Ҳарвард университетига федерал маблағ ажратишни текширмоқда

АҚШ президенти Доналд Трамп маъмурияти Ҳарвард университетида яҳудийларга нисбатан адоват масаласини текширишни бошлади. Бу жараён университетни 9 миллиард долларгача миқдордаги федерал маблағлардан маҳрум этиши мумкин.

Душанба куни АҚШнинг Таълим вазирлиги, Соғлиқни сақлаш ва ижтимоий хизматлар вазирлиги ҳамда Бош хизматлар бошқармаси Ҳарвард университети ва унинг филиалларига ажратилган федерал контрактлар ва грантларни текширишини эълон қилди. Бу ишлар яҳудийларга нисбатан адоватга қарши кураш бўйича қўшма ишчи гуруҳ фаолияти доирасида олиб борилмоқда.

Таълим вазири Линда Макмэн таъкидлашича, Ҳарвард талабаларни яҳудийларга нисбатан адоват асосидаги камситишдан ҳимоя қилишга қодир бўлмаслиги университет нуфузини жиддий хавф остига қўймоқда. Шу боис ҳукумат тегишли контракт агентликлари билан ҳамкорликни тўхтатиш масаласини кўриб чиқмоқда.

Текширув 256 миллион долларлик контрактлар ва 8,7 миллиард долларлик кўп йиллик грант мажбуриятларини ўз ичига олади. Унинг мақсади — университетнинг федерал қоидаларга мувофиқлигини таъминлаш ва фуқаролик ҳуқуқларини ҳимоя қилиш.

Ҳарварднинг жавоб чоралари ва олий таълимга босим

Трамп ва Республикачи партия АҚШдаги олий таълим муассасаларини кескин танқид остига олди. Улар университетлардаги "воук-мафкура"ни танқид қилиб, антисемитизмни текшириш ва университет фондларига солиқ солиш каби чораларни муҳокама қилмоқда.

Ҳарвард университети яҳудийларга нисбатан адоватга қарши курашиш мақсадида бир қатор чораларни амалга оширди. Университет махсус ишчи гуруҳ тузди, антисемитизм айбловлари билан боғлиқ талабалар шикоятлари бўйича келишувга эришди, Яқин Шарқ тадқиқотлари маркази раҳбариятини ишдан бўшатди ва Бирзейт университети билан ҳамкорликни бекор қилди. Шунингдек, ҳар йили камситиш ва тазйиқларга қарши кураш борасида ҳисобот чоп этиш мажбуриятини олди.

Элита олий ўқув юртларига босим кучаймоқда. Колумбия университетига ажратилган 400 миллион долларлик федерал грантлар март ойида тўхтатилди. Бу қарор талабалар намойишларига нисбатан университет бошқарув чораларини ўзгартириш талаблари ортидан қабул қилинди. Пенсилвания университетига ажратилган 175 миллион долларлик маблағ ҳам тўхтатилди, бу қарор университетнинг трансгендер спортчиларни аёллар мусобақаларида иштирок этишига рухсат бериши билан боғлиқ бўлиши мумкин.

Ҳарвард университетининг молиявий ҳолати

Ҳарвард фонди 50 миллиард доллардан ортиқ деб баҳоланади. Университет бу маблағлар талабаларга молиявий ёрдам кўрсатиш учун мўлжалланганини таъкидламоқда. Жорий ой бошида Ҳарвард талабаларни қўллаб-қувватлаш чораларини кенгайтириб, йилига 100 минг доллар ёки ундан кам даромадга эга оилалар фарзандлари учун бакалавр таълимини бепул қилишини эълон қилди.

Ҳарвард юридик факультетининг бир неча ўнлаб профессорлари Трамп маъмуриятининг университетларга босим ўтказиш ва юридик компанияларга қарши чораларини кескин танқид қилди. Уларнинг фикрича, бу ҳаракатлар қонун устуворлигига таҳдид солиши мумкин. Бу вазият Ҳарвард ва бошқа университетлар учун жиддий оқибатларга олиб келиши эҳтимоли бор. “Замин” янгиликларини “Telegram”да кузатиб боринг