Россияда яна бир собиқ вазир “чет эл агенти” деб эълон қилинди

Россия Адлия вазирлиги собиқ ташқи ишлар вазири Андрей Козиревни “чет эл агенти”лар рўйхатига киритди. Бу ҳақда расмий манбалар хабар берди.

Биринчи вазир — чет эл агенти
Козирев Россиянинг янги тарихидаги биринчи ташқи ишлар вазири бўлган. У 1990 йилдан 1996 йилгача ушбу лавозимда фаолият юритган. Шунингдек, Давлат Думасининг 1- ва 2-чақириқ депутатларидан бири бўлган.

Аслида у нима билан айбланмоқда?
Адлия вазирлиги Козиревни:

• Россия ҳукумати сиёсатини танқид қилгани,
  
• Россия армияси ҳақида “фейк” тарқатгани,
  
• Украинага бостириб киришга қарши чиққанлиги,
  
• ҳамда чет эл майдончалари билан ҳамкорлик қилгани учун “чет эл агенти” деб топган.
  

Америкада яшайди, Украинадаги урушни қоралаган
Козирев 2012 йилдан бери АҚШда яшаб келмоқда. У Россиянинг Украинага бостириб киришини кескин танқид қилган ва расмий позицияга қарши чиқишлар билан танилган.

“Чет эл агенти” бўлиш нима дегани?
Россия қонунчилигига кўра, “чет эл агенти” деб тан олинганлар:

• фаолияти ва молиявий харажатлари ҳақида Адлия вазирлигига ҳисобот топширади;
  
• ҳар бир чиқишида (мақола, ижтимоий тармоқ ва бошқаларда) шу мақомни алоҳида белгилаб қўйиши шарт.
  

2022 йилдан буён реестр юритила бошланган ва унда мингга яқин шахс ва ташкилотлар мавжуд.

Сиз нима деб ўйлайсиз – “чет эл агенти” деган мақом қай даражада адолатли ва шаффоф? «Замин»ни Telegram’да ўқинг!