Зеленский Россия билан тўғридан тўғри музокаралар учун қандай шарт қўймоқда?

Украина раҳбари Владимир Зеленский мамлакат ҳудудида ўт очиш тўлиқ тўхтатилганидан кейингина Россия билан ҳар қандай кўринишда музокаралар олиб боришга тайёрлигини билдирди. Бу ҳақда у журналистлар билан учрашув пайтида гапирди.

Президент Зеленский музокаралар жараёнида ҳеч қандай тўсиқ ёки "берк кўча" бўлмаслиги лозимлигини алоҳида таъкидлади. Шу билан бирга, Қрим яримороли Россия томонидан ноқонуний равишда босиб олингани ва буни тан олмаслигини яна бир бор қайд этди.

«Қрим – бу бизнинг еримиз, Украина халқига тегишли ҳудуд. Бунда бошқа гап бўлиши мумкин эмас, чунки бу Конституциямизга зиддир», – дея тушунтирди Зеленский.

Шунингдек, Зеленский мамлакатнинг НАТО аъзолиги бўйича фақат альянсга аъзо бўлган давлатларгина вето ҳуқуқига эга эканини эслатиб ўтди.

Украина раҳбари АҚШнинг тинчлик музокаралари жараёнидан чиқиб кетиши мумкинлиги ҳақидаги хабарларга ҳам муносабат билдирди.

«Биз Америка Қўшма Штатларининг ёрдамидан воз кечишини хоҳламаймиз. Бу нафақат ёрдам, балки разведка маълумотлари, баллистик ҳужумлардан ҳимоя ва халқимизнинг ҳаёти билан боғлиқдир. Менимча, АҚШ каби стратегик ҳамкоримиздан айрилишимиз катта йўқотиш бўлади. Агар Америка музокаралардан чиқиб кетса, бу яхши аломат бўлмайди. Шу сабабли, биз АҚШ президенти Доналд Трамп Украина билан ҳамкорликни давом эттиришига ҳамда Россияга босимни кучайтиришига ишонамиз», – деди Владимир Зеленский.

Эслатиб ўтамиз, АҚШ раҳбари Доналд Трамп 20 апрель куни Россия ва Украина «шу ҳафта ичида» тинчлик келишувига эришишига умид билдирганди. У яқин уч кун ичида Украинада тинчликни таъминлаш бўйича режасини эълон қилишини маълум қилди. Айрим инсайдер маълумотларга кўра, режа лойиҳасида Украина ўз ҳудудининг 20 фоизини «де-факто» тарзда Россия томонига топшириши мумкинлиги назарда тутилган.

Тинчлик режасида ўт очишни назорат қилиш учун халқаро тинчликпарвар кучларини Украина ҳудудига жойлаштириш таклиф қилинмоқда. Назорат ишлари нейтрал давлатлар вакилларидан ташкил топган махсус қўшма комиссия томонидан амалга оширилади.

Бунгача Украина президенти Зеленский Россия томонига мамлакатдаги тинч аҳоли объектларига узоқ масофадан туриб зарба беришни 30 кунга тўхтатиш ва кейинчалик бу муддатни узайтириш таклифини ҳам билдирган эди. Россия президенти Владимир Путин эса мазкур таклиф ўрганилишини ва бу масалада икки томонлама музокаралар олиб бориш мумкинлигини айтган.

«Бу масала жиддий ўрганишни талаб қилади ва уни ҳал қилиш учун икки томонлама музокаралар форматида ишлаш мумкин», деган эди Путин.

Ҳозирда бутун дунё ҳамжамияти Россия ва Украина ўртасида тинчлик музокараларининг қандай давом этишини катта қизиқиш билан кузатмоқда. «Замин»ни Telegram’да ўқинг!