Демократлар Трампнинг бепул ҳуқуқий хизматлар бўйича келишувларини текширмоқда: коррупция ёки босим ўтказилганми?

АҚШ Конгрессидаги Демократик партия вакиллари президент Дональд Трамп маъмуриятининг бир неча юридик компаниялар билан тузган бепул ҳуқуқий хизмат кўрсатиш шартномаларини текширишни бошлади. Улар бу битимларда коррупция ёки фирибгарлик ҳолатлари бўлиши мумкинлигидан хавотирланмоқда. Бу ҳақда АBC телеканали хабар берди.

Маълум бўлишича, аввалроқ Трамп маъмурияти бир қатор юридик фирмаларга санкцияларни бекор қилиш эвазига, улардан бепул хизмат кўрсатиш бўйича келишувларга эришган. Аслида, бу юридик фирмалар аввалроқ Трамп сиёсатига қарши суд жараёнларида иштирок этгани сабабли санкцияларга учраган эди.

Президентнинг махсус фармонлари билан мазкур фирмалар давлат шартномаларидан маҳрум қилинган, адвокатларининг эса ҳукумат биноларига кириши тақиқланган. Натижада, бир нечта фирма маъмуриятга тахминан бир миллиард доллар қийматида бепул юридик хизмат кўрсатишга розилик билдирган.

Ҳозир демократ конгрессменлар ушбу келишувларнинг қонунийлигини суриштирмоқда ва бу битимларда порахўрлик, босим ўтказиш ёки фирибгарлик каби федерал қонунбузарликлар мавжудлигини аниқлашга уринмоқда.

Конгрессменлар бу ҳақда маълумот олиш учун тўққизта юридик фирмага махсус хат йўллади. Улар орасида Kirkland & Ellis LLP, Latham & Watkins LLP, Allen Overy Shearman Sterling LLP, Simpson Thacher & Bartlett LLP, Skadden, Arps, Slate, Meagher & Flom LLP, Willkie Farr & Gallagher LLP, Paul, Weiss, Rifkind, Wharton & Garrison LLP, Cadwalader, Wickersham & Taft LLP ва Milbank LLP каби машҳур фирмалар ҳам бор.

«Бундай келишувлар ҳокимиятни суиистеъмол қилишга розилик бериш маъносини англатади. Фирмангиз келажакда мижозлар манфаатини қандай ҳимоя қилиши ёки президент Трампнинг сиёсатига қарши бўлган масалалар билан қандай шуғулланиши мумкинлиги ҳақида саволлар туғдиради», – дейилади конгрессменлар сўровида.

Шу билан бирга, демократлар юридик фирмалардан ушбу келишувларни тузиш сабаблари, шунингдек, битимларнинг ҳуқуқий ва ахлоқий жиҳатдан қанчалик қонунийлиги ҳақида батафсил тушунтириш беришни талаб қилган.

Бу текширув АҚШ жамоатчилигида катта муҳокамаларни келтириб чиқарди ва натижалари қандай бўлиши ҳамда ушбу масаланинг сиёсий оқибатлари қизиқиш билан кутилмоқда. «Замин»ни Telegram’да ўқинг!