АҚШ Конгрессининг собиқ депутати фирибгарликда айбланиб қамоққа ҳукм қилинди!

АҚШда яна бир шов-шувли сиёсий жанжал ўз якунига етди. Нью-Йорк федерал суди АҚШ Конгресси Вакиллар палатасининг собиқ аъзоси, Республика партияси вакили Жорж Сантосни фирибгарлик ва бошқа жиноятларда айбдор деб топиб, узоқ муддатга озодликдан маҳрум этди. Бу ҳақда Politico нашри хабар бермоқда.

Суднинг якуний ҳукмига кўра, Конгрессда бир йилга ҳам тўлмай фаолият юритган ва кўплаб ёлғон, сохталаштиришлар билан машҳур бўлган Сантос етти йилу уч ой қамоқ жазосини ўташи белгиланди.

Эслатиб ўтамиз, Жорж Сантос 2022 йил кузида Республикачилар партияси номидан Вакиллар палатасига сайланган эди. Аммо ўша йилнинг декабридаёқ The New York Times газетаси унинг Конгрессга сайланиш учун ўз шахсий таржимаи ҳолидаги кўплаб маълумотларни сохталаштиргани ҳақида кенг қамровли текширув эълон қилди. Ўрганишлар натижасида маълум бўлишича, Сантос сайловолди кампанияси учун хайрия йўли билан йиғилган маблағларни ўзининг шахсий эҳтиёжлари, жумладан, қимматбаҳо кийим-кечаклар сотиб олиш ва шахсий қарзларини ёпиш учун сарфлаган.

Шунингдек, унинг яна бир қаллоблик амалиёти очиб ташланди. У бир вақтнинг ўзида ишсиз сифатида рўйхатдан ўтиб, давлатдан нафақа маблағларини олган. Аммо аслида бир инвестиция компаниясида ишлаб, мунтазам равишда катта миқдорда маош олиб келгани аниқланган.

Натижада, АҚШ прокуратураси Жорж Сантосга нисбатан фирибгарлик, молиявий қаллоблик, давлат бюджетидан маблағ ўғирлаш ва АҚШ Конгрессига ёлғон маълумот тақдим этиш каби оғир жиноий айбловлар қўйди. 2023 йил май ойида собиқ депутат қўлга олинган бўлиб, шу йилнинг декабрида Вакиллар палатасидан расман четлатилган эди.

Қайд этиш жоизки, Жорж Сантос АҚШ тарихида Вакиллар палатасидан четлатилган олтинчи депутат сифатида қайд этилди. Унинг депутатликдан четлатилишига оид овоз бериш жараёни эса 2023 йил декабрида ўтказилди ва бу сўнгги 20 йил ичидаги биринчи бундай ҳолат бўлди.

2024 йил август ойида эса Сантос прокуратура билан келишувга бориб, ўз айбининг бир қисмини тан олган ҳамда 370 минг доллар миқдорида жарима тўлашни ўз зиммасига олганди.

Ҳозирги пайтда АҚШ жамоатчилиги орасида бу воқеа кенг муҳокама қилинмоқда. Сиёсий доиралар эса келажакда бундай ҳолатларга йўл қўймаслик учун қатъий чоралар кўрилиши лозимлигини таъкидлашмоқда. «Замин»ни Telegram’да ўқинг!