Россия мигрантлардан ВИЧ ҳақида маълумот талаб қилмоқчи

Россияда меҳнат мигрантлари учун янги талаб — ВИЧ инфекцияси йўқлигини тасдиқловчи мажбурий маълумотнома жорий этилиши мумкин, деб nova24.uz сайти хабар берди.

ТАСС маълумотига кўра, бу ташаббус Давлат думаси томонидан илгари сурилган. Қонун лойиҳаси меҳнат, ижтимоий сиёсат ва фахрийлар ишлари бўйича қўмита раиси Ярослав Нилов томонидан ишлаб чиқилган.

Ҳозирги кунда Россияда ишлашни режалаштираётган мигрантларга тиббий кўрикдан ўтиш учун 30 кун берилади. Мамлакатга 90 кундан ортиқ муддатга келаётганлар учун бу муддат 90 кунгача узайтирилади.

Нилов томонидан таклиф қилинган ўзгаришларга кўра, чет эллик фуқаро чегарадан ўтаётганда тиббий суғурта, ВИЧ, B ва C гепатитлари, сил ва сифилис йўқлигини тасдиқловчи таҳлил натижаларини тақдим этиши керак бўлади.

Бу таҳлиллар Россияга киришдан камида 10 кун олдин олинган бўлиши талаб этилади. Шунингдек, наркотик ва психотроп моддалар йўқлигини кўрсатувчи тест натижаси ҳам киришдан 72 соат олдин олинган бўлиши шарт қилинади. «Замин»ни Telegram’да ўқинг!