Германияда “сохта қирол” ҳибсга олинди: экстремистлар параллел давлат қурмоқчи бўлган

Германия Федератив Республикасида “Германия Қироллиги” номли айирмачи экстремистик ташкилот фаолияти тақиқланиб, унинг раҳбари — ўзини монарх деб эълон қилган Петер Фитзек қўлга олинди. Бу ҳақда Politico нашри Германия ички ишлар вазири Александр Добриндтга таяниб хабар тарқатди.

Вазирнинг маълум қилишича, мазкур ташкилот аъзолари Германия ҳудудида ўзларининг алоҳида параллел давлатини ташкил қилиб, ноқонуний молиявий амалиётлар билан шуғулланган. Германия ҳуқуқни муҳофаза қилиш органлари томонидан олиб борилган махсус рейд натижасида ташкилотнинг тўрт нафар асосий етакчиси қўлга олинган. Улар орасида ўзини “қирол Петер I” сифатида таништирган сохта монарх Петер Фитзек ҳам бор.

Александр Добриндт айтишича, ушбу гуруҳ ўзининг ҳокимиятга бўлган даъволарини антисемитик фитна назариялари билан асослаган ва мамлакатнинг конституцион тузумига қарши чиқиб келган.

Маълумотларга кўра, Петер Фитзек 2012 йилда ушбу ташкилотни асос солган бўлиб, ўзи аввал ошпаз ва каратэ мураббийи сифатида фаолият юритган. Ҳозирги кунда “Германия Қироллиги” ҳаракати 6 минг нафарга яқин тарафдорга эга бўлиб, рейхсбюргерлар орасида энг йирик гуруҳ ҳисобланади.

Германиянинг рейхсбюргер ҳаракати тахминан 20 минг нафар аъзодан иборат бўлиб, улар замонавий Германия Федератив Республикасининг қонунийлигини тан олмайди. Улар ўзларини тарихий “немис рейхи”нинг фуқаролари деб ҳисоблайди ва монархистик, ксенофобик ҳамда антисемитик ғояларга амал қилади.

Экспертларнинг фикрича, бундай экстремистик ҳаракатлар мамлакат хавфсизлиги учун жиддий таҳдид саналади. Шу боис, Германия ҳукумати рейхсбюргерларнинг фаолиятини доимий кузатиб, экстремистик гуруҳларга қарши кескин чора-тадбирларни амалга ошириб келмоқда.

Ҳозирги вақтда ушбу ҳолат юзасидан тергов ишлари давом этмоқда ва қўшимча маълумотлар тез орада эълон қилиниши кутилмоқда.

Фото: Getty Images «Замин»ни Telegram’да ўқинг!